អ្នកចាស់មិនទៅអ្នកថ្មីមិនមក! Ton ស្និទ្ធជាមួយតារាស្រីរូបនេះខ្លាំង ដល់ថ្នាក់ធ្វើរឿងនេះជាមួយគ្នា
គិតមកដល់ពេលនេះ វាមានរយៈពេលប្រមាណជា ១ ឆ្នាំហើយដែលកំលោះសង្ហា Ton និង តារាស្រីថៃជួរមុខ នាង Taew Natapohn បានប្រកាសបែកគ្នាជាផ្លូវការ ដោយកាលនោះគេនៅចាំបានថា ដំណឹងបែកបាក់របស់អ្នកទាំងពីរបានធ្វើឱ្យមហាជនសោកស្ដាយសឹងតែនឹកស្មានមិនដល់ ព្រោះពួកគេអាចរក្សាចំណងស្នេហ៍រហូតដល់ទៅ ១៤ ឆ្នាំ តែចុងក្រោយបែរជាមកបែកគ្នាយ៉ាងផុយស្រួយបែបនេះទៅវិញ ។
ដូចប្រិយមិត្តបានជ្រាបហើយថា ក្រោយប្រកាសបែកពីអតីតសង្សារមិនបានប៉ុន្មាន តារាស្រី Taew Natapohn ក៏ទៅទាក់ទងផ្ដើមស្នេហ៍ថ្មីជាមួយបុរសអ្នកមានហាយសូរគឺលោក Pranai រហូតមកដល់សព្វថ្ងៃ ស្នេហារបស់ពួកគេកាន់តែផ្អែមល្ហែមជាងស្ករតាំងម៉ែទៅទៀត ។
ដ្បិតថាអតីតមិត្តស្រីមានសង្សារមុន ប៉ុន្ដែងាកទៅមើល Ton វិញ ហាក់មិនខ្វល់ខ្វាយ ឬស្វះស្វែងរកអ្នកស្អំបេះដូងថ្មីទាល់តែសោះ ដោយលោកធ្លាប់អះអាងថា ចង់សម្រាកព្យាបាលបេះដូងដែលធ្លុះធ្លាយឱ្យជាសះស្បើយមួយរយៈសិន ។
ពេលវេលាឈឺចាប់កន្លងទៅ Ton ក៏ចាប់ផ្ដើមការងារថ្មីៗ មានឱកាសស្គាល់មនុស្សថ្មីៗ ហើយថ្មីៗនេះ លោកធ្វើឱ្យអ្នកគាំទ្រពេញចិត្តយ៉ាងខ្លាំង បន្ទាប់ពីឃើញលោកហាក់ស្និទ្ធស្នាលនឹងតារាស្រី Mean Sarunthorn ប្លែកខុសពីធម្មតា ។
តារាស្រី Mean Sarunthorn បានបង្ហោះវីដេអូថ្មីមួយនៅលើគណនី IG របស់នាង ហើយរឿងដែលមហាជនចាប់អារម្មណ៍បំផុត នៅក្នុងវីដេអូនោះ មានវត្តមាន Ton ទៀតផង ។ អ្នកទាំងពីរបានរាំក្នុងកម្មវិធី Tik Tok ដោយបញ្ចេញកាយវិការក្រមិចក្រមើមប្រៀបដូចគូសង្សារនឹងគ្នា មើលទៅសមគ្នាខ្លាំងបំផុត ៕
