មិនដាច់ចិត្តរកទ្រនំផ្សេងទេ! តារាជួរមុខ ៥ ដួង ទើបបន្តកុងត្រាថ្មីជាមួយ TV3

ក្ដីស្រមៃរបស់សិល្បករ សិល្បការិនីស្រករក្រោយៗជាច្រើន គឺបានចូលសម្ដែងធ្វើជាតារាកុងត្រាប្រចាំនៅប៉ុស្ដិ៍ទូរទស្សន៍ធំៗ ។

ជាការពិតប៉ុស្ដិ៍ទូរទស្សន៍លេខ ៣ ថៃ ឬ TV3 បច្ចុប្បន្នមានតារាប្រុសស្រីជួរមុខជាច្រើនដួង ដែលអាចនិយាយបានថាតារាគ្រាប់ពេជ្រប្រចាំប៉ុស្ដិ៍មួយនេះ ហើយបើនិយាយឱ្យដល់ទៅ មានតារាប្រុសស្រីជួរមុខច្រើនដួងណាស់ដែលទទួលបានភាពល្បីល្បាញដោយសារការលើកតម្កើងឱ្យសម្ដែងខ្សែភាពយន្តល្បីៗមានអ្នកទស្សនាភ្លូកទឹកភ្លូកដីនាពេលកន្លងមក ។

ហេតុតែឆ្នាំងចាស់បាយឆ្ញាញ់ ធ្វើឱ្យតារាសម្ដែងថៃច្រើនដួង មិនដាច់ចិត្តចាកចេញពីទ្រនំ TV3 នោះទេ ដោយថ្មីៗនេះ មានអ្នកសិល្បៈជួរមុខ ៥ ដួងទើបតែបន្តកុងត្រាថ្មីជាមួយប៉ុស្ដិ៍ទូរទស្សន៍ខាងលើ ។

១- Taew Natapohn ទើបតែបន្តកុងត្រាថ្មីជាមួយថៃ TV3 ។

២- Toey Jarinporn បើតាមប្រភពបានអះអាង តារាស្រីរាងតូចច្រឡឹមរូបនេះ ក៏ទើបចុះកុងត្រាថ្មីជាមួយថៃ TV3 ដែរ ។

៣- Mario Maurer កំពូលតារាសម្ដែងប្រុសស្ថិតក្នុងដួងចិត្តយុវវ័យរូបនេះ បានចុះកុងត្រាថ្មីជាមួយទ្រនំប៉ុស្ដិ៍លេខ ៣ កាលពីពាក់កណ្ដាលឆ្នាំ ២០២០ ។

៤- Bella Ranee ក៏បានចុះកុងត្រាថ្មីដំណាលគ្នាជាមួយ Mario ដែរ ។

៥- Poh Nattwut តារាប្រុសសាច់ចាំរូបនេះក៏មិនដាច់ចិត្តចាកចេញពីថៃ TV3 ដែរ ពោលគឺលោកបានបន្តកុងត្រារយៈពេល ៦ ឆ្នាំជាមួយទ្រនំមួយនេះ ៕