ពិធីការិនីរៀមច្បង ៤ រូប ប្រៀបដូចហង្សសម្បូរវោហារ ប្រជាប្រិយភាពខ្ពស់ គ្មានអ្នកបំបាក់បាន

បើលើកយកពីពិធីការិនីមកនិយាយវិញនោះ គឺកន្លងមកគេសង្កេតឃើញមានពិធីការិនីរៀមច្បងមួយចំនួនបានលាជីវិតសិល្បៈដែលខ្លួនស្រឡាញ់ បែរទៅរស់នៅសាងជីវិតឯកជនតាមបែបផែនរៀងៗខ្លួន ដោយខ្លះសាងគ្រួសារយ៉ាងមានសុភមង្គល ហើយខ្លះទៀតក៏បានបើកមុខជំនួញ ឬ ទៅរស់នៅក្រៅប្រទេស ជាដើម ។

យ៉ាងណាមិញ បច្ចុប្បន្នបើទោះជាមានពិធីការិនីជាច្រើនបន្តរីកស្គុះស្គាយនៅលើវិថីសិល្បៈជាបន្តបន្ទាប់ក៏ពិតមែន ប៉ុន្តែក្នុងនោះគេហាក់សង្កេតឃើញថា ក៏មានពិធីការិនីរៀមច្បងជាច្រើនរូបក៏នៅតែទទួលបានប្រជាប្រិយភាព និង ក្តោបតំណែងជាតារាក្នុងបេះដូងអ្នកគាំទ្រដូចដើម ។

ខាងក្រោមនេះ គឺជាពិធីការិនីរៀមច្បងចំនួន ៤ រូប ដែលមានបទពិសោធលើវិថីសិល្បៈមិនក្រោម ២០ ឆ្នាំនោះឡើយ ប៉ុន្តែអ្នកទាំង ៤ នៅតែអាចក្តោបតំណែងជាពិធីការិនីល្បីឈ្មោះទាំងភាពប៉ិនប្រសប់ក្នុងការនិយាយ ក៏ដូចជាមានវិជ្ជាជីវៈផ្នែកពិធីការិនី ធ្វើឱ្យសិស្សប្អូនជំនាន់ក្រោយយកគំរូតាម ។

១- យុគ ចិន្តា

អ្នកនាង យុគ ចិន្តា បានចូលប្រឡូកក្នុងសិល្បៈធ្វើជាពិធីការិនីប្រមាណជា ៣០ ឆ្នាំមកហើយ មកទល់ពេលនេះពិធីការិនីរៀមច្បងរូបនេះ ក៏នៅតែបន្តជាគ្រាប់ពេជ្រពិធីការិនីនៅស្ថានីយទូរទស្សន៍ CTN ជាច្រើនកម្មវិធី ។

២- គង់ សុជាតិ

អ្នកនាង គង់ សុជាតិ ក៏មិនខុសគ្នាពីអ្នកនាង យុគ ចិន្តា ប៉ុន្មាននោះឡើយ អ្នកនាងមានបទពិសោធជាពិធីការិនីប្រមានជាជិត ៣០ ឆ្នាំ ។ ក្នុងនោះ បើទោះជាអាយុកាន់តែជ្រេ ប៉ុន្តែពិធីការិនីល្បីឈ្មោះរូបនេះនៅតែគ្រងតំណែងក្នុងកម្មវិធីយុវវ័យជាច្រើនរបស់ទូរទស្សន៍ហង្សមាស ។

៣- ស៊ឹម សូលិកា

អ្នកនាង ស៊ឹម សូលិកា បានឈរឈ្មោះជាពិធីការិនីមិនក្រោម ១៥ ឆ្នាំ នោះឡើយ បន្ទាប់ពីអ្នកនាងបានបញ្ចប់អាជីពជាតារាសម្តែងហើយនោះ ។ សព្វថ្ងៃពិធីការិនីរៀមច្បងរូបនេះ ក៏ជាពិធីការិនីមានប្រជាប្រិយភាពយ៉ាងសម្បើមដោយក្តាប់យកកម្មវិធីជាច្រើនរបស់ស្ថានីយទូរទស្សន៍បាយ័ន ។

៤- ដួង ហ្សូរីដា

កញ្ញា ដួង ហ្សូរីដា អាចចាត់ទុកជាសិស្សប្អូនរបស់ពិធីការិនី ៣ រូបខាងលើ ប៉ុន្តែពិធីការិនីរូបនេះក៏មានបទពិសោធ និង ជំនាញផ្នែកពិធីករមិនក្រោម ១៥​ ឆ្នាំដូចគ្នាដែរលើវិថីសិល្បៈ ។ បច្ចុប្បន្ន ពិធីការិនី ដួង ហ្សូរីដា បានក្តាប់ដំណែងក្នុងកម្មវិធីមួយចំនួនរបស់ស្ថានីយទូរទស្សន៍ជាតិ ទទក និង ប៉ុស្តិ៍លេខ ៥ ផងដែរ ៕