ប៉ែន ចំរុង ស្លុតចិត្ត រហូតធ្វើរឿងមួយនេះ ក្រោយអ្នកនាង ស៊ិន ឧត្តមផល្លា លាចាកលោក

តារាចម្រៀងធ្លាប់ទទួលបានប្រជាប្រិយភាពក្រាស់ក្រែលពីមហាជន អ្នកនាង ស៊ិន ឧត្តមផល្លា បានទទួលមរណភាពហើយនៅព្រឹកថ្ងៃទី ២៨ ខែឧសភា ឆ្នាំ ២០២១ នេះ ដោយសារជំងឺមហារីកកូនកណ្ដុរ ។

ការលាចាកលោករបស់តារាចម្រៀង ស៊ិន ឧត្តមផល្លា បានធ្វើឱ្យសិល្បករ សិល្បការិនីជាច្រើនដែលធ្លាប់ស្គាល់ ធ្លាប់រួមការងារជាមួយ មានការកត់ស្លុត រន្ធត់ចិត្តយ៉ាងខ្លាំង ក៏ព្រោះតែវាហាក់ដូចជាលឿនខ្លាំងពេក ដោយអ្នកនាងទើបតែប្រកាសធ្លាក់ខ្លួនឈឺរយៈពេលប្រមាណជា ១ ខែសោះ បែរជាទទួលមរណភាពទៅទាំងអាល័យបែបនេះ ។

យ៉ាងណាមិញ ក្នុងនាមជាអ្នកសិល្បៈមួយរូប លោក ប៉ែន ចំរុង បានបង្ហោះសារចូលរួមរំលែកទុក្ខដល់ការចាកចេញគ្មានថ្ងៃត្រលប់របស់អ្នកនាង ស៊ិន ឧត្តមផល្លា ព្រមទាំងបួងសួងរាល់បុណ្យកុសលដែលលោកធ្លាប់បានសាងកន្លងមក ឧទ្ទិសជូនដំណើរតារាចម្រៀងខាងលើឱ្យបានទៅកាន់សុគតិភពទៀតផង ។

ប៉ែន ចំរុង បានរៀបរាប់ទាំងក្រៀមក្រំថា «ក្នុងនាមសិល្បករមួយរូប សូមចូលរួមរំលែកទុក្ខដ៏ក្រៀមក្រំចំពោះមរណភាពតារាចម្រៀងល្បីឈ្មោះ ទាំងភាសាជាតិ និង អន្តរជាតិ ស៊ិន ឧត្តមផល្លា ដោយសារជំងឺមហារីកកូនកណ្ដុរនៅព្រឹកថ្ងៃទី ២៨ ឧសភា ២០២១ វេលាម៉ោង ៧.៣០ នាទីព្រឹកនេះ… សូមកុសលផលបុណ្យដែលខ្ញុំបានសាងសូមឱ្យវិញ្ញាណក្ខន្ធបងស្រីទៅកាន់សុគតិភពផងចុះ» ៕