មរណភាព ស៊ិន ឧត្តមផល្លា ធ្វើឱ្យរំជើបរំជួលពេញសិល្បៈ តារាជាច្រើនសោកស្តាយក្តុកក្តួល រហូតធ្វើរឿងនេះព្រមគ្នា

កាលពីថ្ងៃទី ២៨ ខែឧសភា ឆ្នាំ ២០២១ កន្លងទៅនេះ មហាជនអ្នកគាំទ្រ មិត្តក្រៅ និង​ ក្នុងរង្វង់សិល្បៈ របស់តារាចម្រៀង ស៊ិន ឧត្តមផល្លា ហាក់ស្លុតចិត្តយ៉ាងខ្លាំង បន្ទាប់ពីទទួលបានដំណឹងមរណភាពរបស់អ្នកនាង ដោយសារជំងឺមហារីកកូនកណ្តុរ ។

ជាការពិត វាហាក់ដូចជាលឿនខ្លាំងពេក ពីដំណឹងនៃការស្លាប់បាត់បង់ជីវិតរបស់តារាចម្រៀង ស៊ិន ឧត្តមផល្លា ព្រោះថាអ្នកនាងទើបតែដាច់ចិត្តបើកបង្ហាញពីជំងឺរបស់ខ្លួនកាលពីប្រមាណ ១ ខែមុនប៉ុណ្ណោះ ហើយស្រាប់តែពេលនេះ អ្នកនាងបានលាចាកលោកគ្មានថ្ងៃវិលត្រលប់ទៅហើយ ។ មិនត្រឹមតែប៉ុណ្ណោះ មរណភាពនេះ អ្នកនាង ស៊ិន ឧត្តមផល្លា បានបន្សល់ទុកកូន ប្រុសស្រី ៣ នាក់ ឱ្យនៅកំព្រាម្តាយយ៉ាងស្រណោះ ។

ដំណឹងដ៏ក្រៀមក្រំនេះ ក៏បានធ្វើឱ្យអ្នកសិល្បៈ ក៏ដូចជាមហាជនបានចូលរួមសោកស្តាយ និង រំលែកទុក្ខក្រុមគ្រួសាររបស់អ្នកនាងយ៉ាងច្រើនផងដែរ ដោយក្នុងនោះគេបានឃើញនៅលើបណ្តាញសង្គមហ្វេសប៊ុក តារាប្រុសស្រីរួមជំនាន់ និង តារាជំនាន់ក្រោយជាច្រើនបានបង្ហោះសាររំលែកទុក្ខយ៉ាងព្រោតព្រាត ។ លើសពីនោះ ក៏មានសិល្បករ-ការិនីមួយចំនួន ក៏បានអញ្ចើញទៅចូលរួមបុណ្យសពដល់គេហដ្ឋានរបស់អ្នកនាងៀតផង ៕