បាត់មុខអស់ ៥ ឆ្នាំ លេចមុខលើកនេះ អុបប៉ា 2PM ពួតដៃគ្នាធ្វើឱ្យអ្នកគាំទ្ររំជើបរំជួល ឡើងកក្រើក (វីដេអូ)

ប្រិយមិត្តអ្នកគាំទ្រទាំងឡាយប្រាកដជាបានស្គាល់ច្បាស់ដូចថ្ងៃ នូវក្រុមចម្រៀងបុរសកូរ៉េដ៏ល្បី 2PM ដែលធ្លាប់បានបម្រើអារម្មណ៍អ្នកគាំទ្រ តាមរយៈបទចម្រៀងពីរោះទាក់ទាញជាច្រើនបទតាំងពីឆ្នាំ​ ២០០៨ មក ។

មួយរយៈក្រោយនេះ បើគិតត្រួសៗគឺប្រមាណ ៥ ឆ្នាំហើយ ដែលក្រុមមួយនេះបានបាត់មុខពីវិស័យ K-POP ដោយសារតែសមាជិកម្នាក់ៗ បានឃ្លាតខ្លួនទៅបំពេញកាព្វកិច្ចយោធា ជាកិច្ចចាំបាច់សម្រាប់ប្រជាជនកូរ៉េ ។

ដោយឡែក កាលពីថ្ងៃទី ២៨ ខែមិថុនា ឆ្នាំ ២០២១ កន្លងទៅ ដំណឹងល្អក៏បានចូលមករន្ថើនបេះដូងអ្នកគាំទ្រម្តងទៀត បន្ទាប់ពីនៅសុខៗក្រុមនេះបានជួបជុំគ្នាធ្វើសន្និសីទនិយាយពីការបញ្ចេញអាល់ប៊ុមថ្មីឈ្មោះ «MUST» ជាស្នាដៃនិពន្ធរួមរបស់ពួកគេផ្ទាល់ ធ្វើឱ្យមហាជនភ្ញាក់ផ្អើលមិនស្ទើរឡើយ ពីវត្តមានរបស់ពួកគេ ។

លើសពីនេះទៅទៀត ការត្រឡប់មកវិញលើកនេះ គេសងេ្កតឃើញថាកំលោះនីមួយៗបានស្រវ៉ានាំយកភាពស្រស់សង្ហាមកដាក់ខ្លួនមិនតិចនោះទេ ដោយពួកគេមានទឹកមុខស្រស់ស្រាយភ្លឺថ្លាជាងមុន ទោះម្នាក់ៗមានវ័យកាន់តែឈានទៅមុខក្តី ។

យ៉ាងណាមិញ អុបប៉ាៗក៏បានថ្លែងសេចក្តីសោមនស្សយ៉ាងខ្លាំងចំពោះអ្នកគាំទ្រ​ទាំងឡាយ ដោយនឹកអរគុណ និង ស្ញើចសរសើរដល់ពួកគេ ដែលបានរក្សាទឹកចិត្តស្រឡាញ់រង់ចាំការត្រឡប់មកវិញរបស់ក្រុមខ្លួន ដោយមិននឿយណាយ ព្រមទាំងការទទួលស្វាគមន៍ដ៏កក់ក្តៅផងដែរ ៕

សូមទស្សនាវីដេអូខាងក្រោម៖

ប្រភព៖ Soompi