ជាង ១ ទសវត្សរ៍មុន តាតា ជាកំពូលតារាចម្រៀងម្នាក់ តែឥលូវបែរជា… (វីដេអូ)

រយៈពេលប្រមាណជា ១៥ ឆ្នាំ មកហើយនៃការចាកចេញពីវិថីសិល្បៈរបស់តារាចម្រៀងម្ចាស់បទ «ដើរវៃគេ» កញ្ញា តាតា បានធ្វើឲ្យមហាជនអ្នកគាំទ្ររូបនាងមានក្តីនឹករឭកយ៉ាងខ្លាំង ។ កាលនោះ គេចាំបានថាមុននឹងបញ្ចប់ និង លែងបង្ហាញមុខលើឆាកតន្ត្រី កញ្ញា តាតា គឺជាតារាចម្រៀងប្រចាំផលិតកម្មសាន់ដេ ។

យ៉ាងណាមិញ កាលពីពេលកន្លងមកទោះជាតារាស្រីរូបនេះ ធ្លាប់បានបង្ហាញវត្តមានក្នុងកម្មវិធីខួបកំណើតរបស់បងប្រុសជាតន្ត្រីករល្បីឈ្មោះលោក រ៉េត ធីដូណា ក្តី តែនាងក៏មិនបានបង្ហាញវត្តមានជាសាធារណៈដល់អ្នកគាំទ្រនោះទេ ។ លើសពីនោះ បើក្រឡេកទៅមើលគណនីហ្វេសប៊ុក ឬ IG របស់បងប្រុសនាង ក៏មិនសូវដែលបង្ហាញរូបភាពថ្មីៗរបស់ប្អូនស្រីនោះឡើយ ពោលគឺលោក រ៉េត ធីដូណា តែងបង្ហោះរូបភាពចាស់ៗរបស់ តាតា ដដែល ។

បើក្រឡេកទៅមើលគណនីហ្វេសប៊ុក និង IG របស់នាង ដែលមានឈ្មោះ រ៉េត ធីតា នោះ ទោះជារៀងរាល់ថ្ងៃនាងតែងបង្ហោះរូបភាពក៏ពិតមែន ប៉ុន្តែមហាជនអ្នកលេងបណ្តាញសង្គមនៅតែមានចម្ងល់ និង ចង់ដឹងថា «តើបច្ចុប្បន្នមុខមាត់របស់តារាស្រីរូបនេះប្រែប្រួលយ៉ាងណា ឬ នៅដូចដើម?» ក៏ព្រោះតែរូបភាពដែលនាងបានបង្ហោះនោះ ហាក់ដូចជារូបតុក្កតា ពោលគឺរូបកាត់តដែលធ្វើឲ្យអ្នកមើលមានការស្រពិចស្រពិលយ៉ាងខ្លាំង ។

ម្យ៉ាងវិញទៀតនោះ ក្រោយពីអ្នកគាំទ្របានទៅមើលវីដេអូ MV ចាស់ៗរបស់នាង ព្រមទាំងវីដេអូនៃការប្រគុំតន្ត្រីនានានោះ ធ្វើឱ្យពួកគេចង់ឱ្យតារាចម្រៀងស្រីនេះវិលត្រលប់មកចូលសិល្បៈវិញ ព្រមទាំងលើកឡើងថា មុខមាត់របស់តារាចម្រៀងរូបនេះនៅក្នុងវីដេអូចាស់ និង ពេលនេះ គឺហាក់ខុសគ្នាដាច់ផឹងតែម្តង ៕