![មកស្គាល់តារាខ្មែរល្បីៗ ៨ រូប មានតំណឈាមជ័រជាអ្នកសិល្បៈតាំងពីអើយ](https://www.popular.com.kh/wp-content/uploads/2021/07/F-1.jpg)
មកស្គាល់តារាខ្មែរល្បីៗ ៨ រូប មានតំណឈាមជ័រជាអ្នកសិល្បៈតាំងពីអើយ
បើនិយាយពីវិថីសិល្បៈនាពេលបច្ចុប្បន្ន ហាក់កំពុងតែទទួលបានសន្ទុះរីកចម្រើនស្ទើរគ្រប់ជំនាញ ហើយក្នុងនោះ គេក៏សង្កេតឃើញមានតារាប្រុសស្រីជាច្រើនក៏បានរះព្រោងព្រាត តាមរយៈការហ្វឹកហាត់បណ្តុះបណ្តាលផ្នែកសិល្បៈ រីឯខ្លះទៀតគឺមានដុងតាមវង្សត្រកូលទៀតផង ។
ក្នុងនោះ គេក៏សង្កេតឃើញមានសិល្បករ-ការិនី ខ្លះជាបងប្អូនបង្កើតនឹងគ្នា ខ្លះទៀតជាប្តីប្រពន្ធ ខ្លះជាម្តាយឪពុក និង កូន ហើយខ្លះទៀតក៏មានជីដូនជីតាជាអ្នកសិល្បៈផងដែរ ។ យ៉ាងណាមិញ ថ្ងៃនេះ «ប្រជាប្រិយ» នឹងលើកយកសិល្បករ-ការិនី ដែលមានសែស្រឡាយ ឪពុកម្តាយ និង ជីដូនជីតា ជាអ្នកសិល្បៈមកជម្រាបជូន ។
១- តារាពហុជំនាញ ខាត់ សុឃីម
តារាពហុជំនាញ ខាត់ សុឃីម ដែលជាបងស្រីបង្កើតរបស់ លោក ខាត់ ចំរើន និង ខាត់ ស្រីវង គឺមានឪពុកម្តាយ ជាសិល្បករបុរាណជើងចាស់ ។ លោកឪពុករបស់អ្នកនាងគឺជាសិល្បករបុរាណជើងចាស់ឈ្មោះ លាវ ខាត់ ។
២- តារាចម្រៀង ឱក សុគន្ធកញ្ញា
តារាចម្រៀង ឱក សុគន្ធកញ្ញា ត្រូវបានគេស្គាល់ថាជាកំពូលតារាចម្រៀងស្រីមួយរូប ដែលឈរនៅលំដាប់កំពូលក្នុងប្រទេសកម្ពុជា ។ តារាចម្រៀងស្រីរូបនេះ គឺជាកូនស្រីរបស់លោក ឱក បូនី ដែលជាតន្រ្តីករម្នាក់ និង លោកស្រី អ៊ីន សុគន្ធ គឺជាគ្រូបង្រៀន និង ជាអ្នកបង្ហាត់រាំនៅសកលវិទ្យាល័យ ភូមិន្ទវិចិត្រសិល្បៈ ។
៣- តារាចម្រៀង ណុប បាយ៉ារិទ្ធ
តារាចម្រៀង ណុប បាយ៉ារិទ្ធ ដែលជាបងប្រុសបង្កើតរបស់តារាចម្រៀង នីកូ និង អ្នកនិពន្ធ អ៊ីណុ ក៏មានឈាមជ័រជាអ្នកសិល្បៈដូចគ្នាដែរ ដោយឪពុករបស់លោក ឈ្មោះ ណុប សម្បត្តិ ជាសាស្ត្រាចារ្យផ្នែករបាំប្រពៃណី ល្ខោនបាសាក់ អ្នកនិពន្ធ ដឹកនាំរឿង និង ជាមន្ត្រីក្រសួងវប្បធម៌ រីឯអ្នកម្តាយឈ្មោះ សំកុល សុភាវី ជាអ្នកនិពន្ធ ។
៤- តារាចម្រៀង ណាំ ប៊ុណ្ណារ័ត្ន
លោក ណាំ ប៊ុណ្ណារ័ត្ន មិនត្រឹមតែជាតារាចម្រៀងតែម្នាក់ឯងនោះទេ លោកក៏មានប្អូនស្រីបង្កើត គឺអ្នកនាង អេនជេឡា ក៏ជាតារាចម្រៀងដូចគ្នាដែរ ។ បងប្អូនបង្កើត ២ រូបនេះ គឺបានចាប់ផ្តើមវិស័យសិល្បៈ ព្រោះមានសែស្រឡាយប្រកបអាជីពលើវិថីនេះគឺជាលោកឪពុក ដែលមហាជនបានស្គាល់ថាជាអ្នកនិពន្ធល្បីឈ្មោះតាំងពីជំនាន់មុន មកដល់បច្ចុប្បន្ន គឺលោក ឯល ប៊ុណ្ណា ។
៥- តារាចម្រៀង សុន ស្រីពេជ្រ
តារាចម្រៀង សុន ស្រីពេជ្រ មិនត្រឹមតែមានបងប្អូនស្រីប្រុសបង្កើតជាតារាកំប្លែង គឺអ្នកនាង កាឆយ និង លោក សង់សេត នោះទេ ។ បើក្រឡេកទៅមើលលោកឪពុករបស់អ្នកនាងវិញ ក៏ជាវីរសិល្បករជើងចាស់មួយរូប ដែលមានឈ្មោះបោះសំឡេងខ្លាំងគឺលោកតា សង់ស៊ីស ។
៦- តារាចម្រៀង ស៊ូ ស៊ីរីកា
តារាចម្រៀងប្រចាំផលិតកម្មថោន កញ្ញា ស៊ូ ស៊ីរីកា ក៏ត្រូវបានមហាជនមានការភ្ញាក់ផ្អើលខ្លាំងណាស់ដែរ ក្រោយពីនាងបានចូលប្រឡូកក្នុងវិស័យសិល្បៈ និង បានបង្ហើបពីជីវប្រវត្តិរបស់ក្រុមគ្រួសារមកនោះ ។ កញ្ញាជាចៅស្រីបង្កើតរបស់តារាសម្តែងជើងចាស់ដ៏ល្បីឈ្មោះគឺ លោកស្រី កែវ មន្ថា ។
៧- តារាចម្រៀង ម៉ានិត
តារាចម្រៀង និង អ្នកនិពន្ធវ័យក្មេង លោក ម៉ានិត ក៏មិនខុសពីសិល្បករខាងលើនេះដែរ លោកក៏មានសែស្រឡាយជាអ្នកសិល្បៈដូចគ្នា ដោយលោកយាយបង្កើតរបស់តារាប្រុសរូបនេះ គឺជាអ្នកនិពន្ធ និង ដឹកនាំរឿងដ៏ល្បីឈ្មោះគឺ លោកស្រី ពាន់ ភួងបុប្ផា ។
៨- តារាចម្រៀង វណ្ណា ស័ក្ត
តារាចម្រៀងប្រចាំផលិតកម្ម M លោក វណ្ណា ស័ក្ត ក៏ត្រូវបានមហាជនជាច្រើនបានដឹងមកហើយថា អ្នកម្តាយរបស់លោកក៏ជាវីរសិល្បករជើងចាស់ គឺលោកយាយ ណយ សំណាង ហៅ យាយណាង ដែលមានជំនាញជាតារាចម្រៀងអាយ៉ៃបុរាណ និង កំប្លែងសម័យនោះ ៕