តារាកូរ៉េ ៩ រូបនេះ ធ្លាប់មានប្រវត្តិប៉ះគ្រោះកាច ប៊ិះនឹងបាត់បង់ជីវិតទាំងវ័យក្មេងចោលអ្នកគាំទ្រ

ប្រិយមិត្តអ្នកគាំទ្រខ្លះ ប្រហែលជាមិនទាន់បានដឹងនៅឡើយនោះទេពីបទពិសោធ ឬ ហេតុការណ៍មិននឹកស្មានដ៏គួរឱ្យរន្ធត់ស្លុតអារម្មណ៍របស់តារាកូរ៉េប្រុសស្រីមួយចំនួនដែលពួកគេបានប្រទះ ទាំងនៅលើឆាក​ និង ក្រៅឆាក ហើយវាថែមទាំងបានដក់ជាប់ក្នុងខួរក្បាលពួកគេមិនទៅណាឡើយ ។

ជាពិសេសមានតារាមួយចំនួន ប្រហែលជាមានគ្រោះធំខ្លាំង ដោយអ្នកខ្លះស្ទើរតែបានធ្លោយរបូតជីវិតឱ្យទៅយមរាជទៅហើយ ក្នុងហេតុការណ៍អាក្រក់ទាំងនោះ តែយ៉ាងហោចណាស់ ក៏មានសំណាងនៅជួយឱ្យបានរួចខ្លួនមកវិញ ដើម្បីបម្រើអារម្មណ៍អ្នកគាំទ្របន្តទៀត ។

១.តារាប្រុស Yunho

សមាជិកក្រុម TVXQ រូបនេះ ធ្លាប់ត្រូវពួកអ្នកស្អប់បន្លំខ្លួនជាអ្នកគាំទ្រ យកទឹកក្រូចច្របាច់ស្រស់ដែលលាយជាមួយនឹងកាវ ឱ្យរូបលោកផឹក ។ នៅពេលដែលលោកបានផឹកបានពាក់កណ្តាល ទើបចាប់អារម្មណ៍ថា ទឹកក្រូចនេះដូចជាមិនសូវស្រួលប៉ុន្មានទេ ហើយលោកក៏មិនបានចងចាំអ្វីទៀតនោះទេ ព្រោះបានសន្លប់ភា្លមៗតែម្តង ។ សមាជិកក្រុមនេះបានឱ្យដឹងថា គេបានប្រញាប់បញ្ជូនលោកទៅមន្ទីរពេទ្យមិនបង្អង់យូរឡើយ ហើយនៅពេលកំពុងបញ្ជូននោះ បានក្អួតចេញឈាមថែមទៀតផង ធ្វើឱ្យសមាជិកម្នាក់ៗភ័យស្លុតមិនស្ទើរឡើយ ។ យ៉ាងណាមិញ លោកក៏ត្រូវបានក្រុមគ្រួពេទ្យសង្គ្រោះបានជោគជ័យផងដែរ ប៉ុន្តែចាប់តាំងពីពេលនោះមក លោកមិនសូវហ៊ានផឹកទឹកក្រូចទៀតប៉ុន្មាននោះទេ ព្រោះតែខ្លាចហេតុការណ៍នេះ អាចកើតឡើងម្តងទៀត ។

២.តារាប្រុស ONEW

ចំណែកប្រុសស្អាតសមាជិកក្រុម SHINEE ម្នាក់នេះវិញ នាឆ្នាំ ២០០៦ ខណៈបញ្ចប់ការប្រគំតន្រ្តីមួយនៅលើឆាក លោកត្រូវបានគ្រោងដែកបំពាក់ដោយភ្លើងសម្រាប់លម្អឆាក រលំប៊ិះនឹងសង្កត់មកលើ ហើយដោយសារតែឈឺជើងពីការសម្តែង បូករួមជាមួយភាពភ័យតក់ស្លុតទៀតនោះ បានធ្វើឱ្យលោកសន្លប់ភ្លាមៗនៅនឹងកន្លែងតែម្តង ។ យ៉ាងណាមិញ បើមិនមានក្រុមការងារ ក៏ដូចជាសមាជិកនៅជិតចាំជួយទប់​នោះទេ លោកប្រាកដជាត្រូវបានខ្ទេចឆ្អឹងនៅក្រោមនោះជាក់ជាមិនខាន ។

៣.តារាប្រុស KyunHyun

នៅក្នុងឆ្នាំ ២០០៧​ ឡានផ្ទាល់ខ្លួនរបស់ក្រុម SUPER JUNIOR ត្រូវបានប្រសព្វឧបទ្ទវហេតុគ្រោះថ្នាក់ចរាចរណ៍មួយយ៉ាងរន្ធត់ ដោយមានសមាជិកពីរបីនាក់បានរងរបួស តែ KyunHyun ជាអ្នករងរបួសធ្ងន់ជាងគេក្នុងចំណោមនោះ ។ ព័ត៌មានបានឱ្យដឹងថា ខណៈកើតហេតុការណ៍នោះ KyunHyun បានខ្ទាតចេញពីឡានរហូតដល់ ៤ ទៅ ៥ ម៉ែត្រឯណោះ ហើយជើងរបស់លោកត្រូវរហែករយះរយាយឃើញដល់ឆ្អឹង ចំណែកឆ្អឹងជំនីរ និង ឆ្អឹងត្រគាកបស់លោកក៏ត្រូវបែកខ្ទេចផងដែរ ។ នៅពេលបញ្ជូនទៅមន្ទីរពេទ្យ គ្រូពេទ្យបានប្រាប់ឪពុកម្តាយលោកថា លោកអាចនឹងបាត់បង់ជីវិតហើយ ហើយបើធ្វើការវះកាត់ក៏មានសង្ឃឹមត្រឹម ២០ ភាគរយប៉ុណ្ណោះ ។ យ៉ាងណាមិញ ដោយសារតែអាយុថ្លៃ ប្រុសស្អាតម្នាក់នេះ បានតស៊ូទាញជីវិតពីយមរាជបានវិញ រហូតដល់មានជីវិតរស់នៅមកដល់សព្វថ្ងៃនេះ ។

៤.តារាប្រុស Son Hoyoung

សមាជិកក្រុមបុរសជើងចាស់ G.o.d រូបនេះ បានប្រទះហេតុការណ៍ដ៏មិនគួរឱ្យនឹកស្មានមួយ នាឆ្នាំ ២០១៣ ។ ដោយសង្សារសំណព្វរបស់លោក បានសម្រេចបញ្ចប់ជីវិតខ្លួនឯងនៅក្នុងឡានរបស់លោក ដោយការដុតធ្យូងបំពុល រួចបិទទ្វារសំងំនៅក្នុងនោះ ។ ក្រោយមកមិនយូរប៉ុន្មាន Hoyoung ក៏បានព្យាយាមសម្លាប់ខ្លួនទៅតាមមិត្តស្រី ដោយប្រើវិធីដដែល តែខណៈនោះឡានរបស់លោកបានផ្ទុះឆេះ ហើយលោកក៏បានប្តូរចិត្តវិញ រួចសម្រេចគេចចេញ តែក៏បានសន្លប់ភ្លាមៗក្រោយចេញមកផុត ។ លោកត្រូវបានគេបញ្ជូនទៅមន្ទីរពេទ្យធ្វើការព្យាបាល ហើយនៅក្នុងការសម្ភាសមួយ លោកបានឱ្យដឹងថា នៅពេលនោះលោកមានជំងឺបាក់ទឹកចិត្តយ៉ាងខ្លាំង និង មានអារម្មណ៍ថាឯកោណាស់ ក្រោយពីអវត្តមានរបស់មិត្តស្រីសំណព្វ ។ ទាំងនេះហើយ គឺជាមូលហេតុដែលបានជំរុញឱ្យលោកប្រព្រឹត្តដូចនេះ ។ យ៉ាងណាមិញ មកទល់ពេលនេះ លោកក៏បានជាសះស្បើយ រួចត្រឡប់មកប្រើជីវិតធម្មតា ក៏ដូចជាប្រឡូកក្នុងសិល្បៈវិញហើយ ។

៥.តារាប្រុស Seungri

សមាជិកក្រុម BIG BANG រូបនេះ បានប្រទះហេតុការណ៍តក់ស្លុតមិនតិចឡើយ ។ កាលពីការចាប់ផ្តើមប្រឡូកក្នុងវិស័យសិល្បៈរបស់លោក នាឆាកប្រគំតន្ត្រីមួយ នៅពេលកំពុងសម្តែង លោកត្រូវបានកាំជ្រួញដែលដាក់នៅលើឆាក ប៊ិះនឹងផ្ទុះត្រូវមុខពេញៗតែម្តង ជាសំណាងលោកបានប្រញាប់គេចចេញទាន់ពេល តែវានៅតែបង្ករបួសស្នាមឱ្យលោកដដែល ហើយក៏ត្រូវបានបញ្ជូនទៅមន្ទីរពេទ្យថែមទៀតផង ។ ក្រោយមកទៀត លោកក៏បានប្រទះហេតុការណ៍ក្រឡាប់ឡានមួយដ៏រន្ធត់ម្តងទៀត តែលោកក៏ត្រូវបានគេបញ្ជូនទៅសង្គ្រោះទាន់ពេលវេលាផងដែរ ។

៦.តារាស្រី Wendy

ស្រីស្រស់សមាជិកក្រុម Red Velvet ម្នាក់នេះ បានធ្លាក់ពីលើជណ្តើរនៅលើឆាកកម្ពស់ជាង ២.៥ ម៉ែត្រខណៈកំពុងសមចម្រៀង ក្នុងការប្រគំតន្រ្តីប្រចាំឆ្នាំ ២០១៩ មួយប្រចាំប្រទេសកូរ៉េ ។ នាងត្រូវបានគេបញ្ជូនទៅមន្ទីរពេទ្យភ្លាមៗ ហើយត្រូវរបួសជាច្រើនកន្លែង​ មានដូចជាបាក់ឆ្អឹងមួយចំនួន បូករួមជាមួយឆ្អឹងត្រគាកស្តាំ ក-ដៃ ព្រមទាំងប្រេះឆ្អឹងថ្ពាល់ និង មានស្នាមជាំជាច្រើនកន្លែងទៀត ។ យ៉ាងណាមិញ នាងបានប្រើពេលរាប់ខែក្នុងការព្យាបាល ទម្រាំតែបានវិលត្រឡប់មកជួបអ្នកគាំទ្រវិញ ។

៧.តារាស្រី Subin

ស្រីស្អាតសមាជិក្រុម Dal Shabet ម្នាក់នេះ បានផុងធ្លាក់ពីលើឆាក ព្រមទាំងបានទង្គិចមុខជាមួយនឹងសំណុំកាំជ្រួញដែលនៅក្រោមនោះ ជាលទ្ធផលនាងត្រូវបានរយះមាត់ខាងក្នុង ដេរអស់រហូតដល់ចំនួន ១៦ ថ្នេរ ។

៨.តារាប្រុស Lee Minho

បុរសមានស្នេហ៍រូបនេះ ក៏បានប្រទះហេតុការណ៍គ្រោះថ្នាក់ចរាចរណ៍មួយដ៏គួរឱ្យរន្ធត់ដូចគ្នា ។ ដោយអ្នកបើកបរ និង អ្នករួមដំណើរជាមួយលោកម្នាក់ទៀតបានស្លាប់ភ្លាមៗ ហើយលោកក៏ត្រូវបានគេបញ្ជូនទៅសង្គ្រោះមិនទុកយូរឡើយ ដោយលោករងរបួសបាក់ជើងជាច្រើនកន្លែង ហើយឆ្អឹងខ្ចីនៅជជ្គង់របស់លោកក៏ត្រូវបានខូតខាតផងដែរ ដែលជាហេតុធ្វើឱ្យលោកនៅតែទទួលការឈឺចាប់ម្តងម្កាលរហូតដល់សព្វថ្ងៃ ។​

៩.តារាប្រុស Heelchul

សមាជិក SUPER JUNIOR រូបនេះវិញ បានប្រទះហេតុការណ៍គ្រោះថ្នាក់ចរាចរណ៍ ខណៈតាមផ្លូវមកផ្ទះត្រឡប់ពីបុណ្យសពរបស់ឪពុកមិត្តភក្តិ នាឆ្នាំ ២០០៦ ។ ដោយលោកបានងងុយងក់ពេលកំពុងបើកបរ ហើយខណៈបើកភ្នែកមកម្តងទៀតក៏បានប្រទះខ្លួនឯងនៅលើគ្រែសង្គ្រោះទៅហើយ ។ លោកបានរងរបួសខ្ទេចជើងខាងឆ្វេងមួយចំហៀងស្ទើរទាំងស្រុង ព្រមទាំងបានទទួលការវះកាត់ដាក់ដែកជាង ៧ បន្ទះចាប់ពីកែងជើងឆ្វេងរហូតដល់ត្រគាក ។ យ៉ាងណាមិញ ចាប់តាំងពីពេលនោះមក លោកមិនអាចរាំបានល្អនោះទេ ដោយសារតែផលវិបាកនៃការវះកាត់ ៕

ប្រភព៖ koreaboo