គង់ ចាន់ស្រីមុំ តារាស្រីហាយសូរ ត្អូញរកស៊ីយូរអត់សល់លុយ សល់តែប្លង់ដី ៦ កន្លែង

ជាការពិតណាស់ មិនថាតែមហាជនអ្នកគាំទ្រ ឬ មិត្តក្រៅ និង ក្នុងរង្វង់សិល្បៈនោះទេ សុទ្ធតែបានដឹងមកហើយពីភាពហាយសូររបស់តារាស្រី គង់ ចាន់ស្រីមុំ ដោយនាងមានជីវិតរស់នៅយ៉ាងសម្បូរបែប មានកេរ្តិ៍ឈ្មោះល្បីល្បាញក្នុងវិថីសិល្បៈ ហើយក៏មានមុខជំនួញកាន់ពេញដៃយ៉ាងជោគជ័យទៀតផង ។

ទន្ទឹមគ្នាទាំងអាជីពសិល្បៈ និង របររកស៊ីកាក់កប គង់ ចាន់ស្រីមុំ តែងតែបង្ហាញនូវជីវិតយ៉ាងមានសុភមង្គល ក្នុងការចាយវាយលុយកាក់យ៉ាងហ៊ឹកហ៊ាក់ ដូចជាការប្រើប្រាស់ សម្ភារនិយម ការតែងខ្លួនហាយសូរ ក៏ដូចជាទិញឡាន ទិញផ្ទះវីឡាជាបន្តបន្ទាប់ ដែលជាហេតុធ្វើឱ្យមនុស្សមិនតិចនោះទេ សរសើរ និង ច្រណែនរូបនាង និង ស្វាមី ព្រមទាំងកូនតូចមានអាយុត្រឹម ៣ ឆ្នាំ កើតមកលើរស់គំនរទ្រព្យសម្បត្តិនេះ ។

យ៉ាងណាមិញ ថ្មីៗនេះ ស្រាប់តែតារាស្រីហាយសូរ គង់ ចាន់ស្រីមុំ បែរជាបានបង្ហោះសារត្អូញត្អែរមួយទៅវិញ ពីការរកស៊ីរបស់ខ្លួនជាយូរឆ្នាំថា គ្មានសល់អ្វីទេ គឺសល់ត្រឹមប្លង់ដី ៦ កន្លែងប៉ុណ្ណោះ ហើយប្លង់ដីទាំង ៦ កន្លែងនោះ នាងបញ្ជាក់ថា ឱបទុកសម្រាប់កូនសំណព្វចិត្តរបស់នាង ៕