អីយ៉ូយ! ខ្សែចង្កេះពាក់លេងៗដ៏ស្តើងល្ហៀរបស់ Jennie តម្លៃស្មើឡានមួយគ្រឿង

តារាស្រីរាងតូចច្រឡឹងសមាជិកក្រុមចម្រៀងល្បីប្រចាំកូរ៉េ BlACKPINK  ស្រីស្រស់ Kim Jennie ត្រូវបានអ្នកគាំទ្រដឹង និង ស្គាល់ថាជាតារាម្នាក់ ដែលមានស្ទីលតុបតែងខ្លួនស្អាតប្លែកម្យ៉ាងមួយបែបពីតារាស្រីទូទៅ ដោយនាងភាគច្រើនចូលចិត្តលេងខ្លួនមើលទៅបែបសិចស៊ី ធ្វើឱ្យរំជួលអារម្មណ៍អ្នកគាំទ្រ តែក៏មានបង្កប់ភាពគួរឱ្យស្រឡាញ់ផងដែរ ។

ជាក់ស្តែង មួយរយៈក្រោយនេះ គេសង្កេតថាឃើញនារីរូបនេះ មើលទៅហាក់ដូចជាជាប់ចិត្តជាមួយការលេងអួតបញ្ចេញក្បាលពោះរាបស្មើរ​សរលោង ជាមួយនឹងចង្កេះរាងរៀវតែមួយក្តាប់របស់ខ្លួន អមជាមួយនឹងស្ទីលពាក់ខ្សែចង្កេះស្តើងស៊ីវីល័យ ដែលមើលទៅពិតជាស៊ីចស៊ីប្លែកភ្នែកសម្បើមណាស់ ថែមទាំងសមសួនទៀតផង​ ។

ដោយឡែក ចំពោះខ្សែចង្កេះឯណេះវិញ ពិតណាស់ជាខ្សែស្តើងល្ហៀមួយប៉ុណ្ណោះ តែបើមើលទៅតម្លៃវិញ គឺបានធ្វើឱ្យទាំងអ្នកគាំទ្រ ក៏ដូចជាមហាជនទូទៅអត់ជញ្ជក់មាត់ហួសចិត្តសរសើរមិនបានឡើយ ព្រោះវាជាប្រ៊េនមួយរបស់ JACQUIE AICHE ហើយមានតម្លៃរហូតដល់ទៅ ១១ ៨៧៥ ដុល្លារឯណោះ ដែលធ្វើពីមាសចំនួន 14K រួមនឹងត្បូងពេជ្រថែមទៀតផង ។

យ៉ាងណាមិញ អ្នកគាំទ្រពិតជាស្រឡាញ់ជាប់ចិត្តនឹងការលេងខ្លួនបែបនេះរបស់នាងណាស់ ហើយក៏សង្ឃឹមដែលថានាងនឹងបន្តវិវត្ត​ចំណង់ចំណូលចិត្តក្នុងស្ទីលហ្វេសសិន​របស់ខ្លួនឱ្យកាន់តែសិចស៊ីស៊ីវីល័យប្លែកពីគេទៅមុខបន្តទៀតផងដែរ ៕