ក្រុមចម្រៀងនារីកូរ៉េ ៧ ក្រុមនេះ ប្រើតែសមត្ថភាពសិល្បៈ វាយលុកពេញពិភពលោក

អាចនិយាយបានថា វិស័យ KPOP ជាកត្តាមួយដ៏សំខាន់ដែលបានជួយជំរុញប្រទេសកូរ៉េខាងត្បូងឱ្យល្បីកក្រើកពាសពេញពិភពលោក។ ក្នុងនោះដែរ គេសម្គាល់ឃើញក្រុមចម្រៀងចំនួន ៧ ដែលបានស្រវាក្ដោបយកជោគជ័យសាងប្រវត្តិសាស្ដ្រក្នុងវិស័យ KPOP ឱ្យមានកេរ្ដិ៍ឈ្មោះល្បីល្បាញមកទល់ពេលបច្ចុប្បន្ន។ ម្ល៉ោះហើយ ថ្ងៃនេះ «ប្រជាប្រិយ» សូមលើកយកក្រុមចម្រៀងនារីទាំង ៧ ក្រុម ដែលបានធ្វើឱ្យប្រទេសកូរ៉ខាងត្បូងមានមោទកភាព​មកបង្ហាញជូនប្រិយមិត្តអ្នកអាន។

៧. Red Velvet

ក្រុមចម្រៀងនារី Red Velvet បានចាប់ផ្តើមប្រឡូកវិស័យ KPOP ក្នុងឆ្នាំ ២០១៤។ ក្រុមនេះ បានទាក់ទាញចំណាប់អារម្មណ៍អ្នកគាំទ្រជុំវិញពិភពលោកមិនតិចឡើយ ចំពោះការចេះបន់បែនក្នុងស្ទីលចម្រៀងរបស់ពួកគេ ដែលមានទាំងបែបគួរឱ្យស្រឡាញ់ (Cute Cute) ឬ បែបស៊ិចស៊ី​ និង អាចនិយាយបានថា គ្រប់រសជាតិចម្រុះតែម្ដង។

៦. Wonder Girls

ទោះបីជាក្រុមចម្រៀងនេះ បានរំសាយរួចហើយក៏ពិតមែន តែបើយើងក្រឡេកទៅមើលសមិទ្ធិផលរបស់ពួកគេ នាកាលប្រឡូកក្នុងឆ្នាំ ២០០៧​ នោះគឺពិតជាមិនធម្មតាឡើយ។ ក្រុមនេះ គឺជាក្រុមចម្រៀង ដំបូងគេបង្អស់ និង នាំមុខគេ ដែលបានព្យាយាមចូលខ្លួនទៅបំបែកទីផ្សារចម្រៀងអាមេរិក។ មិនតែប៉ុណ្ណោះ ចម្រៀងរបស់ពួកគេ ក៏បានជាប់ក្នុងតារាង Billboard ថែមទៀតផង។ ដោយឡែក មកទល់សព្វថ្ងៃក្រុម Wonder Girls  ក៏នៅតែទទួលបានការចងចាំ និង ការគោរព ស្រឡាញ់ពេញចិត្តពីសំណាក់មហាជនដដែល។

៥. KARA

ក្រុមចម្រៀងនេះ បានជាប់ឈ្មោះ ជាក្រុមដែលមានភាពជោគជ័យ និង ជាអ្នកនាំមុខគេក្នុងការទាក់ទាញប្រជាប្រិយភាពគ្របដណ្តប់ក្នុងប្រទេសជប៉ុន។ ក្រុមចម្រៀងនារីរូបស្រស់នេះ ត្រូវបានប្រជាជនជប៉ុនស្រឡាញ់គាំទ្រខ្លាំងណាស់ និង ក្លាយជាក្រុមចម្រៀងនារី ដំបូងគេបង្អស់ ដែលបានសម្តែងនៅកីឡាដ្ឋាន Tokyo Dome របស់ប្រទេសជប៉ុនថែមទៀតផង។

៤. 2NE1

អ្នកណាមិនស្គាល់ក្រុមចម្រៀងនារី 2NE1  ដែលបានធ្វើឱ្យវិស័យ Kpop កក្រើកមិនធម្មតានាពេលកន្លងមក។  ក្រុមចម្រៀងមួយនេះ ពិតជាមិនធម្មតាឡើយ ដោយពួកគេបានប្រើសមត្ថភាពសិល្បៈបម្រើអារម្មណ៍ទស្សនិកជន​តាមរយៈស្ទីលនៃការច្រៀង ពីរោះៗ ក្បាច់រាំប្លែកៗ ព្រមទាំងមានស្ទីលតុបតែងខ្លួនស្អាតៗទាន់សម័យថែមទៀតផង។ យ៉ាងណាមិញ ទោះបីជា 2NE1 បានរំសាយក្រុមហើយក្តី ក៏វត្តមានរបស់ពួកគេនៅតែមាននៅក្នុងបេះដូងអ្នកគាំទ្រជានិច្ច ហើយអ្នកគាំទ្រក៏សង្ឃឹមថាសមាជិកម្នាក់ៗនៅតែអាចបម្រើអារម្មណ៍មហាជនដដែល ព្រោះសមត្ថភាពរបស់ពួកគេម្នាក់ៗពិតជាមិនមានអ្នកណាជំនួសបានឡើយ។

៣. Girls’ Generation

តាំងពីប្រឡូកវិស័យសិល្បៈក្នុងឆ្នាំ ២០០៧​ មក ក្រុមចម្រៀងដែលមានសមាជិករហូតទៅដល់ ៩ នាក់នេះ ត្រូវបានគេទទួលស្គាល់ថា ពិតគ្មាននរណាអាចឈានមុខបានឡើយ ក្នុងការបញ្ចេញចម្រៀងពីរោះៗ ល្បីៗ ជាមួយនឹងស្ទីលរាំទាក់ភ្នែករបស់ពួកគេនាពេលកន្លងមក។ យ៉ាងណាមិញ មកទល់ពេលនេះ សមាជិកក្រុមនេះ នៅសល់ត្រឹមតែ ៥ នាក់ប៉ុណ្ណោះ។ ជាមួយគ្នានោះ ក្រុមចម្រៀងស្រីស្អាតៗនេះ បានផ្អាកការបញ្ចេញចម្រៀងជាក្រុមទៅហើយ ដោយគេឃើញថាសមាជិកម្នាក់ៗ បានងាកទៅធ្វើការក្នុងនាមជាតារាទោលរៀងៗខ្លួនវិញ ប៉ុន្តែមួយរយៈនេះ បានលេចឮថា ពួកគេអាចនឹងត្រលប់មកជុំគ្នាវិញ ក្នុងការបញ្ចេញចម្រៀងជាថ្មី តែបើតាមការមើលទៅ អាចនឹងត្រូវប្រើប្រាស់ពេលវេលាយូរបន្តិច។

២. TWICE

ក្រុមនេះ ត្រូវបានគេដឹងថា បានជាប់ចំណាត់ថ្នាក់ទីពីរ ក្នុងក្រុមច​ម្រៀងនារីជំនាន់ទី ៣ ដែលមានភាពជោគជ័យ ចាប់តាំងពីបានប្រឡូកក្នុងវិស័យសិល្បៈមកម្ល៉េះ។ មិនតែប៉ុណ្ណោះ ពួកគេថែមទាំងបានបំបែកកំណត់ត្រា​ជាច្រើន ដែលធ្វើឱ្យប្រជាប្រិយភាពរបស់ពួកគេ កាន់តែរីកសាយភាពទៅកាន់ពិភពលោកថែមទៀតផង។

១. BLACKPINK

ក្រុម BLACKPINK គឺបានជាប់ចំណាត់ថ្នាក់លេខមួយ ក្នុងចំណោមក្រុមចម្រៀងនារីកូរ៉េ ដែលមានឥទ្ធិពលឆក់យកសន្ទុះប្រជាប្រិយភាពខ្លាំងបំផុតក្នុងវិស័យ KPOP នេះ។ ពួកគេបានធ្វើឱ្យមហាជនទូទាំងពិភពលោក ងាកមកចាប់អារម្មណ៍ជាមួយវិស័យ KPOP កាន់តែខ្លាំងក្នុងឆ្នាំ ២០២១ នេះ។ មិនតែប៉ុណ្ណោះ ក្រុមចម្រៀងស្រីដែលមានសមាជិក ៤ រូបនេះ ព្រមទាំងបានបំបែកទីផ្សារចម្រៀងអាមេរិកជាច្រើន និង ថែមទាំងបំបែកកំណត់ត្រា ទាំងក្នុង និង ក្រៅប្រទេស ព្រមជាមួយនឹងការសហការចេញចម្រៀងជាមួយកំពូលតារាចម្រៀងល្បីៗរបស់ពិភពលោកថែមទៀតផង៕

ប្រភព៖ koreaboo