ក្រោយរំសាយក្រុម ខ្សែជីវិតរបស់សមាជិក Wonder Girl ម្នាក់ៗ សុទ្ធតែដើរមកដល់ត្រឹមនេះ

ពិតណាស់ អ្នកគាំទ្រវិស័យចម្រៀង Kpop ក៏ដូចជាមហាជនមួយចំនួន ប្រាកដជាបានស្គាល់ ឬ បានដឹងមកហើយ នូវក្រុមចម្រៀងនារីកូរ៉េដ៏ល្បី គឺក្រុម Wonder Girl ដែលបានសាងប្រជាប្រិយមិនធម្មតាឡើយ ក្លាយពីជាង ១០ ឆ្នាំកន្លងទៅ។ ជាពិសេស​​ គឺតាមរយៈបទចម្រៀងពីរោះដែលមានចំណងជើងថា «Nobody» នោះឯង។

ក្រុមនេះ ត្រូវបានបង្កើតនៅឆ្នាំ ២០០៧ ដោយក្រុមហ៊ុន JYP ហើយត្រូវបានគេស្គាល់ថា គឺក្រុមចម្រៀងនារីមួយដែលមានឈ្មោះបោះសំឡេងខ្លាំង ក្នុងចំណោមក្រុមចម្រៀងប្រចាំប្រទេស ជំនាន់ទី ២។ គ្រានោះ បទ «Nobody» របស់ពួកគេ ក្លាយជាបទកូរ៉េដំបូងបង្អស់ ដែលបានជាប់ចំណាត់ថ្នាក់ទី ៧៦ ក្នុងតារាង Billboard របស់អាមេរិក ប៉ុន្ដែ អ្វីដែលគួរឱ្យសោកស្តាយនោះ គឺមានសមាជិកមួយចំនួនបានចាកចេញពីក្រុមចម្រៀងជាបន្តបន្ទាប់ រហូតដល់ឆ្នាំ ២០១៧ ក្រុមចម្រៀងនេះត្រូវរំសាយចោលតែម្ដង។ យ៉ាងណាមិញ គិតមកដល់ពេលនេះ គឺមានរយៈពេល ៤ ឆ្នាំហើយ ដែលក្រុមចម្រៀងកូរ៉េដ៏ល្បីនេះ បានរំសាយក្រុម ហើយសមាជិកម្នាក់ៗក៏បានជ្រើសផ្លូវជីវិតដើររៀងៗខ្លួនផងដែរ​។​ ចង់ដឹងថាខ្សែជីវិតរបស់សមាជិកក្រុមម្នាក់ៗពេលនេះទៅជាយ៉ាងណា តោះ! ទៅតាមដានទាំងអស់គ្នា។

១. Yeeun

Yeeun ជាមេក្រុមនៅក្នុងក្រុមចម្រៀង Wonder Girl ហើយនាងមានចំណែកចូលរួមច្រើនណាស់ ក្នុងការនិពន្ធចម្រៀងរបស់ក្រុម។ នាងក៏ជាសមាជិកម្នាក់ ដែលបានបន្តកុងត្រាឡើងវិញម្ដងជាមួយផលិតកម្ម JYP ផងដែរ។ បន្ទាប់ពីបញ្ចប់កុងត្រាម្តងទៀត នាងក៏បានចាកចេញពីផលិតកម្មនេះ ទៅចុះកុងត្រាជាមួយផលិតកម្ម Amoeba Culture វិញ និងបានក្លាយខ្លួនជាតារាងចម្រៀងទោល ចាប់តាំងពីពេលនោះមក។

២.  Sunmi

ស្រីស្រស់ម្នាក់នេះ កាលពីឆ្នាំ ២០១០ នាងបានផ្អាកសកម្មភាពជាមួយក្រុម ដើម្បីផ្តោតលើការសិក្សា ហើយក៏បានត្រលប់មកបន្តលើវិស័យចម្រៀងវិញបន្តទៀត ក្នុងឆ្នាំ ២០១៥។​ ចាប់តាំងរំសាយក្រុមមក Sunmi បានចុះកុងត្រាជាមួយក្រុមហ៊ុន Makeus entertainment ប៉ុន្ដែ មិនយូរប៉ុន្មាន នាងក៏បានចាកចេញពីក្រុមហ៊ុននោះ ហើយបានចុះកុងត្រាជាមួយក្រុមហ៊ុន ABYSS វិញ។ ចាប់តាំងពីពេលនោះមក ស្រីស្អាតរូបនេះ ក៏បានបន្តការងារជាតារាចម្រៀងទោល និង បានបញ្ចេញចម្រៀងកន្ត្រាក់អារម្មណ៍ជាច្រើនបទ ឆក់យកចំណាប់អារម្មណ៍ពីអ្នកគាំទ្រ ព្រមទាំងទាក់ទាញប្រជាប្រិយភាពបានឡើងវិញ រហូតដល់សព្វថ្ងៃនេះ។

៣. Yubin

សមាជិករូបនេះ បានសម្រេចចិត្តបន្ដកុងត្រា ជាមួយផលិតកម្ម JYP នៅឆ្នាំ ២០១៧ ហើយក៏បានបញ្ចេញចម្រៀងទោលជាលើកដំបូងរបស់ខ្លួន នៅឆ្នាំ​ ២០១៨ ជាបន្ដបន្ទាប់។ ក្រោយមកនៅឆ្នាំ ២០២០ នាងក៏បានចាកចេញពី JYP ហើយក៏បានទៅចុះកុងត្រាជាមួយនឹងផលិតកម្ម RRR Entertainment ។ មកទល់ពេលនេះ Yubin នៅបន្តសកម្មភាពសិល្បៈរហូតមក និង ថែមទាំងបាននិពន្ធចម្រៀងដោយខ្លួនឯងថែមទៀតផង។

៤. Hyerim

ស​មាជិកកូនពៅរូបនេះវិញ បន្ទាប់ពីការរំសាយក្រុមហើយ នាងបានលេចមុខនៅក្នុងរឿងភាគមួយចំនួនផងដែរ។ ក្រៅពីសិល្បៈ ស្រីស្រស់រូបនេះ ឆ្លៀតពេលទំនេរព្យាយាមបន្ថែមលើការសិក្សាផងដែរ។

៥. HyunA

នារីស៊ិចស៊ីរូបនេះ ធ្លាប់ជាអតីតសមាជិកក្រុមចម្រៀង Wonder Girl តែនាងបានចាកចេញពីក្រុម បន្ទាប់ពីក្រុមចម្រៀងមួយនេះ បង្កើតបាន ៥ ខែ ក្រោមហេតុផលមានបញ្ហាសុខភាព។ បន្ទាប់មកនៅឆ្នាំ ២០០៨ នាងក៏បានត្រលប់ចូលសិល្បៈម្តងទៀត និង បានក្លាយជាសមាជិកក្រុមចម្រៀង 4Minute នៅឆ្នាំ ២០០៩ ដែលស្ថិតក្រោមការគ្រប់គ្រងរបស់ផលិតកម្ម CUBE Entertainment ។ បន្ទាប់មកក្រុម 4Minute ក៏បានរំសាយក្រុម រួចនាងក៏បានចាកចេញពីផលិតកម្ម CUBE Entertainment នៅឆ្នាំ ២០១៨ ក្រោយបែកធ្លាយរឿងស្នេហាជាមួយ ប្រុសស្អាត DAWN ដែលជាមិត្តភក្ដិរួមទ្រនំ។ ក្រោយពីចាកចេញពីផលិតកម្ម ស្រីស្អាតរូបនេះ បានដឹកដៃមិត្តប្រុស ចុះកុងត្រាជាមួយផលិតកម្ម P Nation វិញ និង បានបញ្ចេញចម្រៀងទោលជាបន្ដបន្ទាប់រហូតមកដល់ពេលបច្ចុប្បន្ន។

៦. Sunye

សមាជិករូបនេះ បានផ្អាកសកម្មភាពពីក្រុម ដើម្បីរៀបការសាងគ្រួសារនៅឆ្នាំ ២០១៣ ហើយក៏បានចាកចេញជាផ្លូវការតែម្តងនៅឆ្នាំ ២០១៤ ដើម្បីយកពេលវេលាទៅមើលថែគ្រួសារ។ រហូតមកដល់ឆ្នាំ ២០១៨ នាងក៏បានសម្រេចចិត្តត្រឡប់មកវិញ ចុះកុងត្រាជាមួយផលិតកម្ម Polaris Entertaiment វិញម្ដង។ បន្ទាប់មក នៅឆ្នាំ ២០២០ នាងក៏បានបញ្ចេញចម្រៀង ជាមួយសមាជិក 2AM គឺលោក Jo Kwon ។ យ៉ាងណាមិញ មកទល់ពេលនេះ នាងជាម្តាយរបស់កូនប្រុសស្រីបីនាក់ទៅហើយ។

៧. Sohee

ស្រីស្រស់រូបនេះ បានចាកចេញពីក្រុមនៅឆ្នាំ ២០១៣ រួចបានសម្រេចចិត្តចុះកុងត្រា ជាមួយផលិតកម្ម BH Entertainment ដោយ នាងបានងាកទៅផ្តោតលើការសម្តែងខ្សែភាពយន្ដវិញម្ដង។ រហូតមកទល់ពេលនេះ នាងក៏បានលេចមុខនៅក្នុងរឿងភាគកូរ៉េជាហូរហែផងដែរ៕

ប្រភព៖ KPOP STARZ