ស្និទ្ធបែបនេះ អ្នកគាំទ្របន់ឱ្យ សេង មង្គល និង ហ៊ិន ចាន់និរ័ត្ន ក្លាយគូស្នេហ៍នឹងគ្នា
កាលពីយប់ថ្ងៃទី ២៦ ខែសីហា ឆ្នាំ ២០២១ កន្លងទៅ មហាជនអ្នកគាំទ្រពិធីការិនីដ៏ស្រស់សោភា កញ្ញា ហ៊ិន ចាន់និរ័ត្ន បានចូលរួមអបអរសាទរ និង រំភើបចិត្តជួសនាងយ៉ាងខ្លាំង ដែលពានរង្វាន់កិត្តិយស Hall of Fame នៅថ្ងៃប្រកួតផ្តាច់ព្រ័ត្រ Frehie Girl & Boy ជំនាន់ទី ២០ បានទៅលើរូបនាងជាអតីត Freshie Girl លេខ ១ ជំនាន់ទី ៦ ។
ជាងនេះទៅទៀត នៅថ្ងៃបង្ហាញវត្តមានលើឆាកក្នុងកម្មវិធីទទួលពានរង្វាន់កិត្តិយស Hall of Fame របស់កញ្ញា ហ៊ិន ចាន់និរ័ត្ន ក៏ត្រូវបានមហាជនចាប់អារម្មណ៍ខ្លាំងលើឈុតរបស់នាង ដែលទោះនាងតុបតែខ្លួនសាមញ្ញៗ មិនមានរំលេចគ្រឿងអលង្ការមែន តែពិតជាស្រស់ស្អាតខ្លាំង ជាមួយនឹងសម្រស់ធម្មជាតិ និង ស្នាមញញឹមរបស់អតីត Freshie Girl រូបនោះ ។
បើទោះជាថ្ងៃទទួលពានត្រូវបានរំលងអស់រយៈពេលច្រើនថ្ងៃហើយក្តី ប៉ុន្តែរូបភាពដ៏ស្រស់ស្អាតរបស់ម្ចាស់ពានកិត្តិយស Hall of Fame ខាងលើនេះ នៅតែត្រូវបានចែករំលែកតៗគ្នាលើបណ្តាញសង្គម ។ លើសពីនោះ អ្វីដែលកំពុងតែធ្វើឱ្យមហាជនអ្នកលេងបណ្តាញសង្គមហ្វេសប៊ុកចាប់អារម្មណ៍នោះ គឺរូបភាពប៉ុន្មានសន្លឹករបស់កញ្ញា ហ៊ិន ចាន់និរ័ត្ន និង ពិធីករដ៏ស្រស់សង្ហាលោក សេង មង្គល ដែលកំពុងឈរកៀកក្បែរគ្នាខ្លាំងដូចជាគូស្នេហ៍ ។
រូបភាពប៉ុន្មានសន្លឹកនៅលើឆាកទទួលរង្វាន់ កំលោះសង្ហា សេង មង្គល បានឈរឱបស្មា ក្រមុំស្រស់ស្អាត ហ៊ិន ចាន់និរ័ត្ន យ៉ាងជាប់ហាក់មិនរបូតដៃទៅណាសោះឡើយ រហូតមានរូបមួយសន្លឹកនោះ អ្នកទាំងពីរមើលទៅស្និទ្ធស្នាលគ្នាខ្លាំង ដូចជាគូស្នេហ៍ពិតប្រាកដយ៉ាងដូច្នោះ ។
ក្នុងនោះដែរ មហាជនអ្នកគាំទ្រតារាប្រុសស្រីទាំង ២ រូប ហាក់ត្រេកអរនូវភាពស្និទ្ធស្នាលរបស់ពួកគេ ហើយខ្លះទៀតក៏ហាក់សង្ឃឹមថា កញ្ញា ហ៊ិន ចាន់និរ័ត្ន និង លោក សេង មង្គល អាចនឹងក្លាយទៅជាគូស្នេហ៍ពិតប្រាកដដូចជាការរំពឹងទុករបស់ពួកគេទៀតផង ព្រោះអ្នកគាំទ្រក៏ធ្លាប់បានចាប់គូឱ្យអ្នកទាំង ២ រួចហើយដែរ បន្ទាប់ពីពួកគេធ្លាប់បានធ្វើការរួមគ្នាកន្លងមក ៕
