ភ្ជាប់ពាក្យជិត ២ ខែ កែវ សុបញ្ញា សំងំចាយជីវិតយ៉ាងមានក្តីសុខនឹងគូដណ្តឹង

បើគិតមកដល់ពេលនេះរយៈពេលប្រមាណជិត ២ ខែហើយ ដែលតារាចម្រៀងប្រចាំផលិតកម្មហង្សមាស កញ្ញា កែវ សុបញ្ញា បានដឹកដៃគូស្នេហ៍ភ្ជាប់ពាក្យតាមប្រពៃណី ។ ក្នុងនោះ បើទោះជាមិនទាន់បានបញ្ជាក់ពីថ្ងៃរៀបការយ៉ាងណាក្តី តែអតីតបេក្ខភាព The Voice Cambodia រដូវកាលទី ១ រូបនេះ ក៏ហាក់កាន់តែមានសុភមង្គលក្នុងជីវិតគូរបស់នាង ។

ជាក់ស្តែង កាលពីពេលថ្មីៗនេះ កញ្ញា កែវ សុបញ្ញា បានដឹកដៃគូដណ្តឹងធ្វើដំណើរកម្សាន្តយ៉ាងរ៉ូមែនទិក​ ដូចជាគូស្វាមី ថ្មីថ្មោងយ៉ាងដូច្នោះ ។ លើសពីនោះ តារាស្រីរូបនេះក៏បានបង្ហោះរូបភាពផ្អែមល្ហែម និង បង្ហោះសារដូច្នេះថា «កុំសួរថាស្ងាត់បាត់ អាបញ្ញា ទៅណា? គេលួចមករកកន្លែងស្ងប់ស្ងាត់ បំបាត់ភាពតានតឹង ហ្នឹងហាស ហាហាហា» ។

គួររំឭកថា កញ្ញា កែវ សុបញ្ញា និង គូដណ្តឹងស្រស់សង្ហាមិនមែនជាអ្នកក្នុងរង្វងសិល្បៈរូបនោះ បានសម្រេចចិត្តភ្ជាប់ពាក្យតាមប្រពៃណីកាលពីថ្ងៃទី ១០ ខែកក្កដា ឆ្នាំ ២០២១ កន្លងមក ដោយមានការចូលរួម ពីក្រុមគ្រួសារ មិត្តភក្តិស្និទ្ធស្នាល និង មិត្តរួមទ្រនំផលិតកម្មរស្មីហង្សមាសផងដែរ ៕