ទើបចេញប្រឡូកតែ តារាស្រី ៥ រូបនេះ ឆក់បានតំណែងធំ មិនចាញ់រៀមច្បង

បច្ចុប្បន្ននេះ គេកត់សម្គាល់ឃើញ មានតារាស្រីវ័យក្មេងជាច្រើនដួង កំពុងត្រូវប៉ាន់ថតសម្តែងក្នុងភាគទូរទស្សន៍នានា ដើម្បីទាញយកការគាំទ្រ និង ប្រជាប្រិយភាពរៀងៗខ្លួន ។ បើនិយាយពីវិស័យខ្សែភាពយន្តវិញ តារាសម្តែងស្រីវ័យក្មេង ៥ ដួង ខាងក្រោមនេះ មិនត្រឹមទទួលបានការកោតសរសើរលើទេពកោសល្យសិល្បៈនៃការសម្តែងប៉ុណ្ណោះទេ ពួកគេត្រូវបានអ្នកគាំទ្រសរសើរថាមាន រូបសម្រស់ស្រស់ស្អាត និង មុខមាត់ឃ្យូដៗមានមន្តស្នេហ៍ធ្វើឲ្យអ្នកគាំទ្រ ជាពិសេសបុរសៗជាច្រើនបាក់ចិត្តលួចស្រឡាញ់មិនតិចនោះទេ ។

១. ឈិន មុន្នីនាថ

តារាស្រីវ័យក្មេង កញ្ញា ឈិន មុន្នីនាថ ដែលត្រូវកូនស្រីបង្កើតអតីតតារាចម្រៀង ឈិន កុសល បានបោះពួយចូលក្នុងវិស័យសិល្បៈយ៉ាងពេញទំហឹង បន្ទាប់ពីបានសាងកេរ្តិ៍ឈ្មោះល្បីល្បាញតាមរយៈរឿងភាគខ្មែរដំបូងនៅលើកញ្ចក់ទូរទស្សន៍ហង្សមាសកាលពីប៉ុន្មានឆ្នាំមុននេះ ។ ត្រឹមវ័យ ១៩ ឆ្នាំ តារាស្រីដែលមានឈាមជ័រជាអ្នកសិល្បៈទាំងឪពុក ម្តាយមីង និង លោកពូរូបនេះ បានកាន់តំណែងជាតួឯកស្រីជាច្រើននៅក្នុងខ្សែភាពយន្តភាគតាមស្ថានីយ៍ទូរទស្សន៍នានា ។ លើសពីនោះ ឈិន មុន្នីនាថ ក៏មានទេពកោសល្យច្រៀងផងដែរ ។

២. អ៊ួន វ៉ាន់វីតា

តារាស្រីវ័យក្មេង អ៊ួន វ៉ាន់វីតា បានចាប់អាជីពជាតារាសម្តែងតាំងពីតួអង្គកុមារ រហូតក្លាយទៅជាតួឯកស្រីនៅក្នុងខ្សែភាពយន្តជាច្រើន ។ មិនត្រឹមតែមានសមត្ថភាពក្នុងការសម្តែងម្យ៉ាងនោះទេ តួអង្គយុវវ័យ វ័យ ១៦ ឆ្នាំ រូបនេះមានជំនាញសម្តែងបង្ហូរទឹកភ្នែក ដែលមហាជនបានស្គាល់ថាជានាង «ផ្កាថ្ម» ក៏បានចាប់យកអាជីពជាតារាចម្រៀង និង ហ្វឹកហាត់ផ្នែករបាំផងដែរ ។ ពេលកន្លងមកនេះ នាងបានចេញនូវបទចម្រៀងផ្ទាល់ខ្លួនជាច្រើនបទមកហើយដូចជាបទ «មនុស្សក្នុងបេះដូងអូន» បទ «សុំទោសសង្សាររោងចក្រ» និង បទចម្រៀងជាច្រើនទៀតផងដែរ ។

៣. ចែឡេង

តារាស្រីវ័យក្មេង រាងតូចច្រឡឹង ចែឡេង ត្រូវបានមហាជនស្គាល់ដំបូងក្នុងការថត MV បទចម្រៀង Original មួយ ។ ក្រោយមកតារាស្រីវ័យ ២២ ឆ្នាំរូបនេះ ក៏បានបង្ហាញវត្តមានក្នុងខ្សែភាពយន្តភាគខ្លី និងបានឆក់យកបេះដូងអ្នកទស្សនា ជាពិសេសយុវវ័យជាច្រើនឲ្យលង់នឹងទេពកោសល្យសិល្ប និង សម្រស់របស់នាង ។ បច្ចុប្បន្ន ចែឡេង បានបង្ហាញវត្តមានក្នុងខ្សែភាពយន្តភាគរបស់ទូរទស្សន៍មួយចំនួន និង ចូលរួមថតស្បតពាណិជ្ជកម្មឲ្យផលិតផលសម្រស់ជាច្រើនផងដែរ ។

៤. ដា ដាវ

តារាស្រីវ័យក្មេង ដា ដាវ ផ្តើមចូលបង្ហាញខ្លួនដំបូងចេញពីការថតផ្សព្វផ្សាយផលិតផល បន្ទាប់មកតារាស្រីវ័យ ២៤ ឆ្នាំរូបនេះ បានចាប់ផ្តើមប្រឡូកក្នុងវិស័យសិល្បៈពេញលេញនៅក្នុងការសម្តែងកុនរបស់ផលិតកម្មក្នុងស្រុកមួយ។ ក្រោយមក តារាស្រីរូបនេះក៏បានសាងកេរ្តិ៍ឈ្មោះ និង ចូលរួមសម្តែងខ្សែភាពយន្តភាគបែបយុវវ័យជាច្រើនទៀតផង ។

៥. វណ្ណៈ បរមី

តារាស្រីវ័យក្មេង វណ្ណៈ បរមី ផ្តើមឈានចូលវិស័យសិល្បៈដំបូងជាតារាម៉ូដែល ក្រោយមកដោយរូបសម្រស់ និង សមត្ថភាពប៉ិនប្រសប់ផ្នែកសិល្បៈ តារាស្រីវ័យ ២២ ឆ្នាំ រូបនេះក៏បានវិវត្តន៍ខ្លួនជាតារាសម្តែង ដោយចូលរួមថតភាពយន្ត និង រឿងភាគជាច្រើនផងដែរ៕