ធ្លាយមូលហេតុ Ken ក្ដាប់តំណែងតួឯក តាំងពីចូលសិល្បៈថ្ងៃដំបូង រហូតអាយុ ៤៣ ឆ្នាំនៅមិនរបេះ

ជឿជាក់ថា រាល់ការសម្ដែងរបស់កំពូលតារាចាស់វស្សាលោក Ken Theeradeth គឺដឹងតែមិនអាចរំលងចេញពីខ្សែចក្ខុរបស់មហាជនយើងនោះទេ។ ចាប់តាំងតែចូលប្រឡូកក្នុងសិល្បៈមក តារាប្រុសរូបនេះហាក់ទទួលបានការគាំទ្រខ្លាំងទៅហើយ រហូតមកទល់ពេលនេះមានអាយុ ៤៣ ឆ្នាំ មានគ្រួសារមានកូនហើយនោះ ក៏តារាប្រុស Ken នៅតែបន្តអាជីពរបស់ខ្លួន និង ទទួលបានការគាំទ្រដូចដើម មិនចាញ់កាលពីលោកនៅក្មេងឡើយ។

ទន្ទឹមនឹងឈានជើងចូលក្នុងវិស័យសិល្បៈ គេកត់សម្គាល់ឃើញថា តារាប្រុសរូបនេះតែងតែក្ដាប់បានតំណែងតួឯកមករហូត គ្មានពេលណាមួយដែលលោកលេងជាតួធម្មតានោះឡើយ។ ពិតណាស់ ដោយហេតុថាមានឈាមជ័រអ្នកសិល្បៈ មានឪពុកជាអ្នកដឹងនាំរឿង លោក Ken បានប្រឡូកចូលលើវិស័យសម្ដែងតាំងតែអាយុ ៧ ឆ្នាំមកម៉្លេះ ហើយដោយសារសមត្ថភាពសម្ដែងល្អ បូកផ្សំនឹងរូបសម្បត្តិស្រស់សង្ហាផង លោកក៏បានចូលសម្ដែងក្នុងស្ថានីយទូរទស្សន៍ប៉ុស្តិ៍លេខ ៣ និង ក្ដាប់បានតំណែងតួមករហូត។

យ៉ាងណាមិញ គ្មានអ្វីប្លែកនោះទេ ដែលតារាប្រុសវ័យ ៤៣ ឆ្នាំរូបនេះ អាចឈរជើង និង ក្ដាប់បានតំណែងរបស់ខ្លួនដដែល ដោយគ្មាននរណាមកផ្ដួលបាន ទោះបីបច្ចុប្បន្នមានតារាថ្មីរះព្រោងព្រាតក៏ដោយ នោះគឺសមត្ថភាពខ្លាំងរបស់លោក Ken ដែលលោកអាចសម្ដែងបានគ្រប់តួ មិនថាស្លូត កាច អ្នកលេង កំប្លែង គឺតារាប្រុសរូបនេះអាចធ្វើបានទាំងអស់។

កន្លងមក មានប្រិយមិត្តច្រើនណាស់ មិនថាក្នុង និង ក្រៅស្រុកទេ គឺតែងតែសរសើរមិនដាច់ពីមាត់ឡើយចំពោះទេពកោសល្យដ៏ល្អឯករបស់តារារូបនេះ។ ជាមួយគ្នានេះ សម្រាប់បច្ចុប្បន្ន លោក Ken ក៏ជាតារាប្រុសចាស់វស្សាគំរូម្នាក់សម្រាប់តារាពន្លកថ្មីថៃត្រូវត្រងត្រាប់រៀនសូត្រផងដែរ៕