៥ ឆ្នាំមុន និង ឥលូវ នាង គន្ធា ប្រែវាសនា ព្រមទាំងសម្រស់ ខុសគ្នាដាច់ភឹង!

ជឿជាក់ថាប្រិយមិត្តភាគច្រើនប្រាកដជានៅចាំមិនភ្លេចនូវសំឡេងដ៏ពីរោះក្រអួនក្រអៅ ស្ដាប់ឡើងព្រឺសម្បុរផុសចេញពីមាត់ក្មេងស្រីអាយុ ១៧ ឆ្នាំម្នាក់ឈ្មោះ នាង គន្ធា តាមរយៈបទ «ម៉ែ» នៅក្នុងកម្មវិធីប្រឡងចម្រៀងលំដាប់ពិភពលោក Cambodian idol កាលពីប្រមាណជា ៥ ឆ្នាំមុនមិនខាន ។

កាលនោះ នាង គន្ធា គ្រាន់តែជាក្មេងស្រីសាមញ្ញម្នាក់ ដែលកាន់ដៃបងប្រុសមកចូលរួមការប្រឡងចម្រៀង ប៉ុន្ដែការបង្ហាញខ្លួនលើកទី ១ របស់ក្មេងស្រីរូបនេះ ឆក់បានការចាប់អារម្មណ៍ជាច្រើនសន្ធឹកសន្ធាប់ពីសំណាក់ទស្សនិកជន ដែលអាចនិយាយបានថា ការបង្ហើរសំឡេងរបស់ គន្ធា បានកែប្រែវាសនារបស់ក្មេងស្រីសាមញ្ញម្នាក់ឱ្យក្លាយជាតារាចម្រៀងអាជីពរហូតដល់សព្វថ្ងៃ ។

ពេលវេលាកន្លងទៅច្រើនឆ្នាំ នាង គន្ធា មិនត្រឹមតែខិតខំកែប្រែវាសនារបស់ខ្លួនឱ្យក្លាយជាតារាចម្រៀងប្រចាំផលិតកម្មសាន់ដេប៉ុណ្ណោះទេ ប៉ុន្ដែនាងពេលនេះក៏បានកែប្រែរូបរាងខ្លួនឯង កាន់តែស្អាតមើលសឹងមិនស្គាល់ ទាំងមុខមាត់ និង ពណ៌សម្បុរ ក៏ស្រស់ថ្លាស្អាតជាងមុនដាច់ភឹង ។

លើសពីនេះ នាង គន្ធា ពេលនេះមិនដូច នាង គន្ធា កាលពី ៥ ឆ្នាំមុនទៀតទេ ព្រោះថា គន្ធា ពេលនេះចេះតុបតែងខ្លួនស័ក្ដិសមទៅតាមកាលៈទេសៈស្អាតប្លែកឡើងពីមួយថ្ងៃទៅមួយថ្ងៃ ហើយពេលខ្លះនាងថែមទាំងចេះស្លៀកពាក់សិចស៊ីបញ្ចេញសាច់យ៉ាងទាក់ទាញទៀតផង ៕