កំពូលតារាហុងកុងទាំងមូល តែ Ruco Chan ហែកកេរ្តិ៍ខ្លួនឯងខ្ទេច រឿងដេកនោមដាក់ពូកពីក្មេង

តារាសម្ដែងប្រុសប្រចាំប៉ុស្តិ៍ TVB លោក Ruco Chan កាលពីពេលកន្លងទៅនេះ តារាប្រុសវ័យ ៤៥ ឆ្នាំរូបនេះ លោកបានបង្ហាញវត្តមានចូលរួមជាភ្ញៀវកិត្តិយស ក្នុងកម្មវិធីមួយរបស់កុមារ។

បើនិយាយអំពីជីវិតកាលពីនៅបឋមសិក្សារបស់តារាសម្ដែងរូបនេះវិញ អំឡុងពេលធ្វើបទសម្ភាស លោកបាននិយាយថា គាត់ចូលចិត្តលេងវាយកូនឃ្លីលើតុ។ ពេលនោះ លោក Ruco បាន​និយាយថា៖ «ប្រសិនបើខ្ញុំលេងចាញ់ ខ្ញុំនឹងយំពេញមួយថ្ងៃព្រោះអ្វីដែលខ្ញុំគិតរាល់ថ្ងៃគឺឈ្នះ»។ សម្រាប់អ្នកដែលមិនធ្លាប់ដឹងអំពីលោក តាមការពិត Ruco ក៏ធ្លាប់ជាកីឡាករក្មេង​ជាង​គេ​ដែល​តំណាងឱ្យហុងកុង ក្នុងការប្រកួតវាយកូនឃ្លីលើតុនៅក្រៅប្រទេសផងដែរ។ ហើយលោកក៏ជាមិត្តរួមថ្នាក់នឹងតារាសម្ដែងប្រុសរបស់ TVB លោក Edwin Siu ដែរ។

ខណៈនោះ មានរឿងមួយទៀតដែលអ្នកគាំទ្រទាំងអស់របស់លោក នឹកស្មានមិនដល់បើកភ្នែកធំៗរឹតទ្រូង អស់សំណើចស្ទើរគ្រប់គ្នា ពេល Ruco បានទម្លាយថា៖ «ខ្ញុំធ្លាប់ប្រាប់ខ្លួនឯងថា កុំធ្វើឱ្យសើមគ្រែ នៅពេលយប់។ ព្រោះថាកាលខ្ញុំនៅក្មេង ខ្ញុំតែងតែធ្វើដូច្នេះ ខ្ញុំមិនអាចទប់ទឹកនោមរហូតដល់ខ្ញុំ មានអាយុ២ ទៅ ៣ឆ្នាំ»។

គួរបញ្ជាក់ផងដែរថា នៅអាយុ ១៧ ឆ្នាំ លោកបានចាកចេញពីសាលា ដោយបញ្ចប់ការសិក្សាត្រឹមថ្នាក់ទី ៥ ហើយលោកក៏បានសម្រេចចិត្តចុះឈ្មោះចូលរៀនវគ្គបណ្តុះបណ្តាលសិល្បកររបស់ TVB ទោះបីជាឪពុករបស់លោកប្រឆាំងដាច់ខាតមិនឱ្យធ្វើក៏ដោយ៕

ប្រភព៖ TODAYONLINE