BamBam ទម្លាយត្រង់ៗឥតលាក់ ឱ្យតែជួបតារាស្រីរូបនេះ គឺដឹងតែមានអារម្មណ៍បែបនេះភ្លែត

ប្រិយមិត្តដែលនិយមតាមដានវិស័យចម្រៀង K-POP មុខជាធ្លាប់បានដឹង និង ស្គាល់ BamBam សមាជិករូបស្រស់ប្រចាំក្រុមចម្រៀងបុរស GOT7 ដែលមានសញ្ជាតិជាថៃ។

កំលោះសង្ហាវ័យ ២៤ ឆ្នាំ រូបនេះបានសាងភាពចាប់អារម្មណ៍ជាខ្លាំងតាមរយៈសមត្ថភាពការរាំ ច្រៀង និង រ៉េបរបស់គាត់ ដោយបានឆក់យកចិត្តប្រិយមិត្តអ្នកគាំទ្រនារីៗរាប់ម៉ឺននាក់ឱ្យធ្លាក់ក្នុងអន្លង់ស្នេហ៍។

យ៉ាងណាមិញ BamBam ធ្លាប់ទម្លាយរឿងគួរឱ្យអៀនខ្មាសមួយឱ្យដឹងថា ៖ «មានពេលមួយដែលលោកចាំមិនភ្លេចនោះ គឺពេលដែលលោកបានជួបជាមួយ Taeyeon សមាជិកក្រុម Girls’ Generation នៅលើឆាកតន្ត្រីតែមួយ។ ដោយ Taeyeon ជានារីម្នាក់ដែលលោកតែងលួចសរសើរ និង និយមស្តាប់បទចម្រៀងរបស់នាង ហើយក៏ជានារីដែលលោកលួចមើលម្នាក់ផងដែរ។ ពេលជួប Taeyeon លោកធ្វើអ្វីមិនត្រូវ រហូតត្រូវរមួលខ្លួនស្ទើររអិលដួលនៅលើឆាក ដែលធ្វើឱ្យលោកខ្មាសជាខ្លាំង ជាពិសេសលោកបានឃើញ Taeyeon សើចឱ្យលោកថែមទៀត ដែលនេះគឺជារឿងដែលលោកខ្មាសផង អៀនផង និង រំភើបផងរកស្មានមិនត្រូវ»៕

ប្រភព៖ KPOPSTARZ