សោកស្ដាយ! តារាចម្រៀង សែម សង្វាត បានទទួលមរណភាពហើយ យប់មិញនេះ

នៅថ្ងៃទី ៣០ ខែកញ្ញា ឆ្នាំ ២០២១ កន្លងទៅនេះ មានការភ្ញាក់ផ្អើលយ៉ាងខ្លាំង បន្ទាប់ពីមហាជនបានទទួលដំណឹងថា សិល្បកររៀមច្បង លោក សែម សង្វាត កំពុងស្ថិតក្នុងបន្ទប់សង្គ្រោះបន្ទាន់ (ICU) នៅមន្ទីរពេទ្យលោកសង្ឃ ព្រោះអាការជំងឺប្រចាំកាយរបស់លោកបានវិវត្តន៍កាន់តែធ្ងន់ធ្ងរទៅៗ។

ដោយឡែកនៅព្រឹក ថ្ងៃទី ០១ ខែតុលា ឆ្នាំ ២០២១ នេះ មហាជនកាន់តែរន្ធត់ចិត្តជាខ្លាំង ក្រោយពីទទួលដំណឹងថា អតីតតារាចម្រៀង លោក សែម សង្វាត បានទទួលមរណភាពហើយ នៅយប់រំលងចូលថ្ងៃទី ០១ ខែតុលា នេះ។

បើយោងតាមរយៈការបង្ហោះលើបណ្ដាញសង្គមហ្វេសប៊ុក សង្វាត បញ្ញា online shop បានរៀបរាប់ថា ៖ «សូមជូនជាដំណឹងដល់ពុកម៉ែអ៊ំពូមីងទាំងអស់គ្នាឱ្យបានជ្រាបថា នៅយប់ថ្ងៃទី 30 រំលងចូលថ្ងៃទី 01 លោកឪពុកខ្ញុំបាទឈ្មោះ សែម សង្វាត (បានទទួលមរណភាព) នៅវេលាម៉ោង 12:10 នាទី ដោយជំងឺប្រចាំកាយ»។

បន្ទាប់ពីទទួលដំណឹងយ៉ាងរន្ទត់ចិត្តនេះ មហាជនអ្នកលេងបណ្ដាញសង្គម ក៏ដូចជាសិល្បករ-ការិនីជាច្រើន បានសម្ដែងនូវការចូលរួមសោកស្ដាយជាពន់ពេក ព្រមទាំងចូលរួមរំលែកទុក្ខដ៏សែនក្រៀមក្រំនេះ ដល់ ក្រុមគ្រួសាររបស់ អតីតតារាចម្រៀងប្រុសរូបនេះផងដែរ៕