ក្រោយរងព្យុះរិះគន់ធ្ងន់ៗថាជាតារាចម្រៀងសណ្តែកដី ពុធ មិថុនា ទម្លាយអារម្មណ៍បែបនេះ

ថ្មីៗនេះ ផលិតកម្មរាម ដែលមានអ្នកនាង ស្រីអូន ជាចាងហ្វាង និង មានកំពូលតារាចម្រៀង មាស សុខសោភា និង លោក ដួង វីរៈសិទ្ធ ជាតារាចម្រៀងនោះ បានប្រកាសស្វែងរកតារាចម្រៀងថ្មី ហើយភ្លាមៗនោះ គេក៏បានឃើញវត្តមានរបស់លោក ពុធ មិថុនា ដែលត្រូវបានមហាជនស្គាល់ថាជាតារាសម្តែង និង ជាតារា fb និយម cover បទចម្រៀងមកច្រៀង ក៏បានក្លាយជាតារាចម្រៀងផ្លូវការរបស់ផលិតកម្មនេះផងដែរ។

យ៉ាងណាមិញ ក្រោយបង្ហាញវត្តមានក្នុងបទចម្រៀងដំបូងតារាចម្រៀងវ័យក្មេង ពុធ មិថុនា ត្រូវរងព្យុះធំដោយទទួលបានការរិះគន់យ៉ាងចាស់ដៃពីមហាជន លើកឡើងថាទឹកដមសំឡេងរបស់លោកមិនស័ក្តិសមជាតារាចម្រៀងនោះឡើយ រហូតហៅលោកថា «តារាចម្រៀងសណ្តែកដី»។

ភ្លាមនោះ ក្រោយទទួលរងការរិះគន់នេះដែរ លោក ពុធ មិថុនា ហាក់មានការអាក់អន់បាក់ទឹកចិត្តរហូតលោក លើកជាសំនួរថា «តើលោកត្រូវបញ្ចប់អាជីពជាតារាចម្រៀងនេះឬទេ?» ដោយ លោក ពុធ មិថុនា រៀបរាប់ថា៖ «អ្នកចម្រៀងសណ្តែកដី ច្រៀងមិនកើតផង ចេះតែរាមយកមកឱ្យច្រៀងដែរ និយាយមែនចុះដូចខ្វះតារាចម្រៀង បានហើយឈប់ច្រៀងទៅ ថ្លង់ណាស់ សំឡេងអន់ជាងក្មេងរៀនថ្នាក់ទី ១ ទៀត។ ចេះឱ្យច្រៀងដែរ? ពីមុនគ្រាន់តែអ្នកចម្រៀងអេតចាយៗម្នាក់សោះ! ងាប់មើលសំឡេង  ចង់និយាយថាច្រៀងមិនកើត  ចេះបានចូលផលិតកម្មរាមដែរ ព្រះនឹងមែនអ្នកចម្រៀងរបស់រាមសំឡេងដូច…  ចេះបានចូលផលិតកម្មល្បីកើតដែរ? ដូចខ្វះណាស់ចឹងអ្នកសំឡេងពីរោះមានឡើងច្រើនមិនយក មកយកសំឡេងបែបចឹងៗអី ហ៊ឹម! ផលិតកម្មរាម មិនសមយកអ្នកចម្រៀងចឹងចូលច្រៀងសោះ អ្នកច្រៀងដូច.. ឱកាសចូលផលិតកម្មគឺជាក្តីស្រមៃរបស់ខ្ញុំ គឺជាក្តីសង្ឃឹមក្នុងអាជីពជាអ្នកចម្រៀង ហើយអរគុណផលិតរាម ដែលផ្តល់ឱកាសនេះឱ្យខ្ញុំ។ អរគុណផលិតកម្មរាម ដែលយល់ពីតម្លៃអ្នកចម្រៀងខ្ចីវ័យរបស់ខ្ញុំ តែពេលនេះខ្ញុំហាក់មានអារម្មណ៍ថា ខ្ញុំកំពុងតែអាត្មានិយម ដែលធ្វើឱ្យផលិតកម្មមួយនេះត្រូវបានមហាជនមិនឱ្យតម្លៃដោយសារតែខ្ញុំ។ ប្រាប់ផងថាខ្ញុំគួតែបញ្ចប់អាជីពនេះត្រឹមនេះ ឬ យ៉ាងណា? ពីខ្ញុំ អ្នកចម្រៀងសណ្តែកដី»។

ជាក់ស្តែង ក្រោយមានការរិះគន់ និង សាររបស់លោក ពុធ មិថុនា បានបង្ហោះដូច្នេះ ក៏មានមហាជនជាច្រើនបានចូលទៅខមមិនលើកទឹកចិត្ត និង គាំទ្រដល់លោកឱ្យបន្តលើអាជីពនេះ។ លើសពីនោះ ក្រឡេកទៅមើល អ្នកនាង ស្រីអូន ដែលជាចាងហ្វាងផលិតកម្មរាម ក៏បានចេញមកលើកទឹកចិត្ត ប្រាប់លោក ពុធ មិថុនា កុំឱ្យចុះចាញ់ និង ប្រាប់មូលហេតុអ្នកនាង សម្រេចជ្រើសរើសលោក ពុធ មិថុនា ជាតារាចម្រៀង ព្រោះលោក ពុធ មិថុនា ស្រលាញ់តស៊ូលើវិស័យសិល្បៈនេះ និង មានសមត្ថភាពណាស់៕