តារាប្រុស ៣ ដួងចាយជីវិត Single បែបអភិជន មិនទាន់គិតរឿងស្នេហ៍

ក្រឡេកទៅមើលក្នុងរង្វង់សិល្បៈ មានសិល្បករ-ការិនីជាច្រើន បានសម្រេចចិត្តរៀបការសាងគ្រួសារ និង មានទាយាទស្នងត្រកូលកំពុងរស់នៅយ៉ាងមានសុភមង្គល តែយ៉ាងណា ក៏មានតារាមួយចំនួននៅមិនទាន់សម្រេចចិត្តសាងគ្រួសាដែរ។ ជាក់ស្តែងដូចជាតារាចម្រៀងប្រុសជួរមុខ ៣ ដួង បើទោះជាបោះជំហានលើវិថីនេះយូរឆ្នាំក្តី តែអ្នកទាំង ៣ ហាក់មិនអើពើ គិតគូរស្វែងរកគូជីវិត រៀបការយកភរិយា សាងគ្រួសារនោះឡើយ ពោលគឺសុខចិត្តរស់នៅក្នុងជីវិត Single ទៅវិញ។

លើសពីនោះ អ្វីដែលកាន់តែចាប់អារម្មណ៍ទៀតតារាចម្រៀងទាំង ៣ ដួង មិនត្រឹមតែមានអាយុល្បាក់ជាង ៣០ ឆ្នាំ ប៉ុណ្ណោះទេ តែអ្នកទាំង ៣ គឺសុទ្ធសឹងតែជាតារាប្រុសដែលឈរឈ្មោះជាលំដាប់តារាចម្រៀង មានទ្រព្យស្តុកស្តម ចាយជីវិតយ៉ាងអភិជន បើទោះជានៅលីវក៏ដោយ។

១. តារាចម្រៀង ឆន សុវណ្ណារាជ

បើទោះជាមានវ័យ ៣៧ ឆ្នាំហើយក្តី លោក ឆន សុវណ្ណារាជ ហាក់មិនទាន់គិតគូររឿងគូជីវិតនោះឡើយ បើទោះជាកន្លងមក លោកធ្លាប់មានពាក្យចចាមអារ៉ាមសាងចំណងស្នេហ៍នឹងនារីស្រស់ស្អាតក្រៅសិល្បៈក្តី។ បច្ចុប្បន្ន ទោះមិនទាន់បង្ហើបពីរឿងអនាគត តែលោក ឆន សុវណ្ណារាជ កំពុងតែចាយជីវិត Single យ៉ាងអភិជន ជាមួយនឹងទ្រព្យសម្បត្តិស្តុកស្តមរបស់លោក ដោយមានទាំងលុយ ឡាន វីឡា និង គ្រឿងពេជ្រទៀតផង។

២. តារាចម្រៀង ករុណា ពេជ្រ

មិនខុសគ្នាពីលោក ឆន សុវណ្ណារាជ នោះឡើយ លោក ករុណា ពេជ្រ បើទោះមានវ័យកាន់តែកៀក ៤០ ឆ្នាំហើយក្តី តែលោកក៏មិនទាន់មានដំរួយណាមួយនិយាយពីរឿងចូលរោងការនោះឡើយ។ ក្នុងវ័យ ៣៨ ឆ្នាំ ថែមទាំងនៅលីវផងនោះ លោក ករុណា ពេជ្រ កំពុងរស់នៅក្នុងជីវិតយ៉ាងអភិនជន ដោយមិនត្រឹមតែជាអ្នកជំនួញផ្នែកអចលនទ្រព្យនោះឡើយ តែបើក្រឡេកទៅមើលជីវិតឯកជន លោកមានផ្ទះវីឡាប្រៀបបានភូមិគ្រិះ ឡានទំនើបៗ និង សំភារសុទ្ធតែមានតម្លៃ។

៣. តារាចម្រៀង សុគន្ធ ថេរ៉ាយុ

បើទោះជាមានអាយុតិចជាងតារាចម្រៀង ២ រូបខាងលើក្តី តែលោក សុគន្ធ ថេរ៉ាយុ ឆ្នាំនេះ ​មានអាយុ ៣៣ ឆ្នាំហើយ។ ក្នុងវ័យនេះដែរ តារាចម្រៀង សុគន្ធ ថេរ៉ាយុ ក៏ហាក់មិនដែលបង្ហើបពីជីវិតគូស្រកររបស់លោកនោះទេ តែលោកកំពុងតែរស់នៅលើគំនរទ្រព្យដ៏មានសុភមង្គលក្នុងជីវិតអភិជនរបស់ខ្លួន ដោយមានទាំងផ្ទះវីឡា ឡានទំនើបៗជាច្រើនគ្រឿង និង សំភារនិយមជាច្រើនទៀត៕