Lisa មិនបានចូលរួមកម្មវិធីហ្វេសសិននៅប៉ារីស ស្រាប់តែ Jennie ត្រូវអ្នកគាំទ្រថៃដាប់ផាំងៗបែបនេះ

ថ្មីៗនេះ មហាជនអ្នកគាំទ្រជាច្រើនបានមានការមួម៉ៅក្តៅក្រហាយយ៉ាងខ្លាំងជាមួយនឹងផលិតកម្ម YG ដោយសារតែរឿងគេឱ្យ Lisa ទៅក្រុងប៉ារីសប្រទេសបារាំង តែបែរជាមិនអនុញ្ញាតឱ្យនាងចូលរួមកម្មវិធីហ្វេសសិន ដោយអះអាងលើបញ្ហាកូវីដ ទាំងដែលសមាជិកដទៃទៀតអាចចូលរួមបាន។

ជាមួយគ្នានេះ មានអ្នកគាំទ្រមួយចំនួន ក៏បានស្រវេស្រវាបង្កើតយុទ្ធនាការនៅតាមបណ្តាញសង្គមជាច្រើន នៅក្នុងន័យទាមទារឱ្យផលិតកម្ម YG មើលឡើងវិញនូវតារាងការងារ ក៏ដូចជាស្វែងរកយុតិ្តធម៌​ឱ្យតារាស្រីផងដែរ។

ក្នុងនោះ មានផេកបណ្តាញសង្គមរបស់ថៃមួយ បានចេញមុខមកផុសផ្សព្វផ្សាយយុទ្ធនាការមួយនេះដូចគ្នា តែគេបែរជាទាញឈ្មោះរបស់ Jennie មកចូលក្នុងផុសជារបស់គេ ហាក់ដូចជាមានបំណងចង់បន្ទោសទៅលើនាងទាំងអស់ ចំពោះបញ្ហារបស់ Lisa។

មិនយូរប៉ុន្មាន ស្រាប់តែមានមហាជនមួយចំនួន បានចូលមករិះគន់ទៅលើ Jennie ផាំងៗបន្តបន្ទាប់តែម្តង ដោយចោទថា ព្រោះតែនាងនេះហើយ ទើប Lisa មិនបានចូលរួមកម្មវិធីហ្វេសសិន​ ពោលគឺចង់មានន័យថា ខាងផលិតកម្មពិតជាមានភាពលម្អៀងទៅលើនាង និង មិនយុត្តិធម៌ចំពោះ Lisa ព្រោះគេឱ្យនាងចូលរូមកម្មវិធី Paris Fashion Week តំណាងឱ្យ Chanel តែបែរជាមិនអនុញ្ញាតឱ្យ Lisa ចូលរួមកម្មវិធីណាមួយឡើយ ទាំងដែលនាងក៏បានធ្វើដំណើរពីប្រទេសកូរ៉េឡើងទៅប៉ារីសម្នាក់ឯង។

មួយវិញទៀត នេះមិនមែនជាលើកទីមួយឡើយ ដែលស្រីស្រស់ Jennie ត្រូវបានមហាជន ជាពិសេសអ្នកគាំទ្រជនជាតិថៃមួយចំនួន បាននាំគ្នាមិនពេញចិត្ត រួចនាំគ្នារិះគន់ថាឱ្យនាងយ៉ាងមិនសំចៃដៃបែបនេះ ពោលគឺគេតែងតែចោទបន្ទោសជានិច្ច ចំពោះរឿងបញ្ហាដែលកើតឡើងចំពោះ Lisa។

យ៉ាងណាមិញ អ្នកគាំទ្រផ្សេងៗទៀត រឹតតែមានការខឹងសម្បាចំពោះផេកមួយនោះ ព្រោះមិនគួរណាកំពុងតែមានរឿងរកាំរកូសបែបនេះហើយ គេបែរជាឆ្លៀតទាញសមាជិកដទៃមកទម្លាក់ពាក់ព័ន្ធថែមទៀត ហើយគេក៏បានទាមទារឱ្យផេកនោះ ចេញមុខមកសុំទោសជាផ្លូវការផងដែរ៕

ប្រភព៖ KBI ZOOM