ប្រឡូកសិល្បៈបានជាង ៥ ឆ្នាំ Han So Hee ត្រូវមិត្តរួមថ្នាក់ទម្លាយចរិតពិតខ្ទេច ពេលនៅរៀនវិទ្យាល័យ
ប្រិយមិត្តដែលនិយមតាមដាន និង ទស្សនារឿងភាគកូរ៉េ ប្រាកដជាធ្លាប់បានស្គាល់តារាសម្តែងស្រីស្រស់ រាងតូចច្រឡឹង Han So Hee ដែលសាងភាពចាប់អារម្មណ៍តាមរយៈរឿង «Nevertheless» ឡើយ។
តារាស្រីវ័យ ២៦ ឆ្នាំរូបនេះ មានទេពកោសល្យ និង សមត្ថភាពគួរឱ្យកោតសរសើរ បើទោះបីជានាងជាតារារះថ្មី ដែលទើបចូលសម្តែងបានជាង ៥ ឆ្នាំក្តី។ ដុងសម្តែងពីកំណើត ជាមួយរូបសម្រស់របស់នាង បានធ្វើឱ្យ Han So Hee មានកេរ្តិ៍ឈ្មោះអណ្តែតត្រសែត រហូតមានអ្នកតាមដានក្នុងបណ្តាញសង្គម Instagram ជាង ៤.៥ លាននាក់។
យ៉ាងណាមិញ Han So Hee ត្រូវបានមិត្តរួមថ្នាក់ទម្លាយអំពីអត្តចរិតពិតរបស់នាង នៅអំឡុងពេលរៀនវិទ្យាល័យថា ៖ «Han So Hee គឺជាក្មេងស្រីខ្វះភាពកក់ក្តៅពីម្តាយ ភាគច្រើនគេតែងឃើញរូបនាងរងថ្មបាក់ជំនួសកំហុសម្តាយនាងជានិច្ច តែនាងនៅតែគោរពស្រឡាញ់គាត់។ ពួកយើងរៀនជាមួយគ្នា និង រាប់អានគ្នាអស់ជាច្រើនឆ្នាំ តែខ្ញុំមិនសូវឮនាងនិយាយពីម្តាយរបស់នាងទេ ភាគច្រើនគឺនាងតែងរំឭកពីលោកយាយនាងច្រើនជាង ដោយតែងនិយាយថាលោកយាយនាងផ្តល់ក្តីស្រឡាញ់ឱ្យនាងច្រើនៗ»។
មិត្តរួមថ្នាក់រូបនោះបន្តថា ៖ «ពេលមានកម្មវិធីតម្រូវឱ្យអាណាព្យាបាលចូលរួម គេតែងឃើញលោកយាយនាងមកចូលរួមជំនួសម្តាយនាង។ បើទោះបីជារស់នៅខ្វះការថ្នាក់ថ្នមពីម្តាយ តែនាងនៅតែជាមនុស្សដែលពោរពេញដោយភាពរឹងមាំ នាងជាមនុស្សមិនចូលចិត្តពឹងផ្អែកអ្នកដទៃនោះឡើយ នាងតែងជួយមិត្តរួមថ្នាក់តាមដែលអាចធ្វើបាន។ ហើយខ្ញុំបានដឹងថា Han So Hee លួចទៅធ្វើការក្រៅម៉ោងដើម្បីរកចំណូលផ្គត់ផ្គង់ការសិក្សាដោយខ្លួនឯង តាំងពីអំឡុងពេលរៀនវិទ្យាល័យ»។
បន្ថែមពីនេះទៀត ៖ «Han So Hee ជាមនុស្សដែលឱ្យតម្លៃមិត្តភាពណាស់ រាល់ពេលមានកម្មវិធីជួបជុំមិត្តភក្តិចាស់ៗ គឺនាងតែងឆ្លៀតពេលមកចូលរួមជានិច្ច បើទោះបីជានាងមានកាលវិភាគការងារស្ទើរតែដកឃ្លាពុំរួចក្តី។ នាងមិនដែលភ្លេចពួកខ្ញុំដែលជាមិត្តភក្តិនោះឡើយ ហើយពួកយើងសង្ឃឹមថានាងនឹងកាន់តែមានកេរ្តិ៍ឈ្មោះល្បីនៅពេលខាងមុខ»៕
ប្រភព៖ Koreaboo
