នៅចាំតួក្មេងក្នុងរឿង «The Karate Kid» ទេ? ឥលូវពេញកំលោះស្តូក សាច់ដុំកង់ៗសង្ហាអស់ទាស់
កាលពីជំនាន់ឆ្នាំ ២០១០ ប្រិយមិត្តមួយចំនួនប្រាកដជាធ្លាប់បានទស្សនាហើយនូវខ្សែភាពយន្ត «The Karate Kid» ដែលជារឿងដ៏ល្បីមួយចូលរួមសម្ដែងពីសំណាក់តារាគុនចិនដ៏ល្បី Jackie Chan ផងដែរនោះ។
ខ្សែភាពយន្តនេះដែរ រៀបរាប់ពីក្មេងប្រុសម្នាក់ឈ្មោះ Dre ដែលដើរតួដោយ Jaden Smith ត្រូវរងការធ្វើបាបពីសំណាក់តួអង្គឈ្មោះ Chen ដែលសម្ដែងដោយ Zhenwei Wang នៅសាលារៀនរបស់គេ។ ទោះជាយ៉ាងណា អ្វីៗត្រូវបានផ្លាស់ប្ដូរ នៅពេលដែល Dre រាប់អានគ្នាជាមួយ Mr Han (Jackie Chan) ដែលជាអ្នកជំនាញគុនកុងហ្វូ។
កន្លងទៅជាង ១០ ឆ្នាំហើយ ខ្សែភាពយន្តមួយនេះ នៅតែទទួលបានការគាំទ្រដដែល ខណៈមហាជនមួយចំនួននៅនឹកភ្នកថា តើតួអង្គនីមួយៗប្រែប្រួលរូបរាងយ៉ាងណាអស់ហើយ។ ជាក់ស្ដែង តារាសម្ដែង Zhenwei Wang ក៏ត្រូវបានមហាជនចាប់អារម្មណ៍ខ្លាំងផងដែរ។
បច្ចុប្បន្ន Zhenwei Wang មានអាយុ ២៥ ឆ្នាំហើយ និង មិនសូវលេចមុខក្នុងខ្សែភាពយន្តថ្មីអ្វីនោះឡើយ។ ស្រាប់តែចុងឆ្នាំ ២០២០ កន្លងទៅ Zhenwei បានធ្វើឱ្យមហាជនភ្ញាក់ផ្អើល ក្រោយឃើញវត្តមានរបស់លោកក្នុងវីដេអូមួយ ធ្វើការបញ្ចេញស្នៀតប៉ះជាមួយតួអង្គប្រុសរឿង «Shang Chi»។
វត្តមានរបស់ Zhengwei នាពេលបច្ចុប្បន្ន បានធ្វើឱ្យគ្រប់គ្នាលាន់មាត់សរសើរពីរូបរាងយ៉ាងស្រស់សង្ហា សាច់ដុំកង់ៗរបស់លោក បូករួមទាំងក្បាច់គុនដ៏រស់រវើក ពោរពេញដោយសមត្ថភាពពិតៗ៕
