មិនស្មានថាតារាសម្តែង Gong Yoo ជាកូនចៅជាប់សាច់ឈាមបុគ្គលល្បីក្នុងប្រវត្តិសាស្រ្តចិនរូបនេះ

ធ្លាប់តែឃើញបុរសសង្ហា Gong Yoo ជាតារាសម្តែងម្នាក់ ដែលមានសន្ទុះប្រជាប្រិយភាព ការស្រឡាញ់គាំទ្រខ្លាំងខ្លាដូចជាតារាជួរមុខទូទៅប្រចាំប្រទេសកូរ៉េ តែមិនដឹងសោះឡើយថា លោកមានប្រវត្តិខ្សែស្រឡាយពូជអំបូរគួរឱ្យចាប់អារម្មណ៍ប្លែកពីគេយ៉ាងនេះសោះ។

តារាប្រុសរូបនេះ បានទម្លាយឱ្យដឹងនៅក្នុងកម្មវិធីជំនួបអ្នកគាំទ្រនាកោះតៃវ៉ាន់ កាលពីឆ្នាំ ២០១៧ យ៉ាងដូច្នេះថា​ តាមពិតទៅលោកគឺជាខ្សែស្រឡាយកូនចៅជំនាន់ទី ៧៩ របស់អ្នកប្រាជ្ញ ខុងជឺ ដែលជាកំពូលអ្នកទស្សនវិជ្ជាដ៏ល្បីមួយរូបប្រចាំប្រវត្តិសាស្រ្តប្រទេសចិន។

ជាក់ស្តែង ត្រកូលរបស់លោកផ្ទាល់ Gong គឺឈ្មោះត្រកូលរបស់ជនជាតិកូរ៉េ ដែលតំណាងឱ្យការមានជាប់សាច់ឈាមជាកូនចៅសាវតារបស់អ្នកប្រាជ្ញខុងជឺនោះឯង។ គួរឱ្យដឹងដែរថា វង្សត្រកូលខុងជឺ គឺជាខ្សែស្រឡាយពូជអំបូរដែលមានមែកធាងច្រើន និង វែងជាងគេបង្អស់ប្រចាំពិភពលោក ទើបធ្វើឱ្យមានការបែកខ្ញែករហូតទៅដល់ប្រទេសកូរ៉េដូចនេះ។

យ៉ាងណាមិញ អ្នកគាំទ្រមួយចំនួនពិតជាមានការភ្ញាក់ផ្អើលមិនតិចនោះទេ ដែលតារាសំណព្វរបស់ខ្លួន មានជាប់សាច់ឈាមជាមួយរហូតដល់បុគ្គលមានកេរិ៍្តឈ្មោះប្រចាំប្រវត្តិសាស្រ្តយ៉ាងនេះនោះ៕