ទម្លាយតម្លៃមកុដ Miss Universe Cambodia ស្អាតហើយមានដាំត្បូងពេជ្រខៀវរតនគិរី ទម្ងន់ ៥០ ការ៉ាត់ យ៉ាងប្រណីត
កម្មវិធី Miss Universe Cambodia 2021 ជិតឈានដល់រាត្រីវគ្គផ្ដាច់ព្រ័ត្រហើយ ពោលគឺនៅរាត្រីថ្ងៃទី ២៨ ខែតុលា ឆ្នាំ ២០២១ នេះ ដែលកម្មវិធីនឹងស្វែងរកឃើញម្ចាស់ជ័យលាភីគ្រងមកុដនៃ Miss Universe Cambodia ២០២១ នេះហើយ។
យ៉ាងណាមិញ កាន់កៀកថ្ងៃ ថ្មីៗនេះ តាមរយៈផេកសិល្បករកម្ពុជា បានបង្ហោះពីម្ចាស់ឧបត្ថម្ភមកុដ Miss Universe Cambodia 2021 គឺ លោក ចិន សំណាង ម្ចាស់ហាងពេជ្រ CSNJ ដែលបានឱ្យដឹងថា មកុដដែលនឹងត្រៀមបំពាក់ឱ្យម្ចាស់ជ័យលាភីបវរកញ្ញាចក្រវាលឆ្នាំនេះ មានតម្លៃរហូតដល់ទៅ ២២៥០០ ដុល្លារឯណ្ណោះ។ ដោយមកុដនេះ រចនារំលេចនូវក្បាច់ផ្ការំដួល និង ដាំដោយត្បូងពេជ្រពណ៌ខៀវចំកណ្ដាល ដែលត្បូងនេះ ជាត្បូងពេជ្ររតនគីរី មានទម្ងន់ ៥០ ការ៉ាត់ និង មានតម្លៃ ១២៥០០ ដុល្លារ។
ជាមួយគ្នានេះ មហាជនអ្នកលេងបណ្ដាញសង្គម ជាពិសេសអ្នកគាំទ្រវិស័យបវរកញ្ញា កំពុងតែមានចិត្តអន្ទះសារង់ចាំអ៊ុតមើលថា តើបេក្ខភាពបរវកញ្ញារូបណា ដែលនឹងក្លាយជាម្ចាស់មកុដមួយនេះ នឹងត្រូវបន្តតំណែងពី កញ្ញា រ៉េត សារីតា Miss Universe Cambodia 2020 នៅរាត្រីថ្ងៃទី ២៨ ខែតុលា ឆ្នាំ ២០២១ នេះ។
គួរបញ្ជាក់ផងដែរ ម្ចាស់ជ័យលាភី Miss Universe Cambodia 2021 នេះ នឹងត្រូវតំណាងឱ្យកម្ពុជាចូលរួមកម្មវិធីប្រកួតបវរកញ្ញាចក្រវាល ២០២១ លើកទី ៧០ ដែលត្រូវបា្ររព្ធឡើងនៅឯទីក្រុងអ៊ីលីត ប្រទេសអ៊ីស្រាអែល នៅចុងឆ្នាំ ២០២១ នេះ៕
