វ៉ាន់ ដេវីត តួមាណព សម្ញែងរាងល្វែងលើជះរាងសង្ហា ធ្វើឱ្យក្រមុំ មេម៉ាយ ជាច្រើនប្រាថ្នាចង់ធ្វើនាងបដាចារ

តារាសម្ដែង វ៉ាន់ ដេវីត ដែលបានសម្ដែងជាតួអង្គ មាណព ក្នុងរឿង «បដាចារ» កំពុងធ្វើឱ្យទស្សនិកជនដែលជាសុភាពនារីៗ ទាំងក្រមុំ និង មេម៉ាយ នាំគ្នាជ្រួលច្របល់ចង់ធ្វើជាតួនាង បដាចារ ស្ទើរតែគ្រប់គ្នា បន្ទាប់ពីរូបលោកបង្ហាញវត្តមានសម្ដែងជាមួយនឹង នី មុន្នីនាថ ដែលមហាជនភាគច្រើនដាក់រហស្សនាមនាងថាជាតារាទឹកភ្នែក។

គេចាំបានថា គ្រាន់តែរឿង «បដាចារ» ចេញភាគដំបូងភ្លាមៗ តួអង្គ មាណព រូបនេះ ត្រូវបានទស្សនិកជនជាច្រើន លង់ស្នេហ៍នូវរូបរាង មុខមាត់ និង ស្នាមញញឹមបែបស្រទន់ទាក់ទាញរបស់លោកបាត់ទៅហើយ ព្រោះតារាប្រុសរូបនេះ មិនត្រឹមតែមានទេពកោសល្យផ្នែកសិល្បៈដ៏ប៉ិនប្រសប់ប៉ុណ្ណោះទេ តែលើសពីនោះ លោកក៏បានជះរាងសង្ហារាយមន្តស្នេហ៍ទាក់ចិត្តស្រីៗឱ្យឈ្លក់វង្វេងដែរ។

អ្វីដែលកាន់តែធ្វើឱ្យអ្នកគាំទ្រជញ្ជក់មាត់មិនឈប់ គឺនៅពេលដែលប្រុសស្អាត វ៉ាន់ ដេវីត ថតរូបសម្ញែងល្វែងលើបង្ហាញពីសាច់ដុំហាប់ណែន ជាមួយនឹងដងខ្លួនមាំៗតាមរយៈបណ្ដាញសង្គមហ្វេសប៊ុកផ្លូវការរបស់ខ្លួន កាន់តែធ្វើឱ្យបេះដូងនារីៗលោតខុសចង្វាក់ថែមទៀត៕