គួរឱ្យអាណិត! តារាកំប្លែង តាចេក ត្អូញស៊ូចោលផ្ទះ មកលក់ផ្លែឈើតាមផ្លូវដើម្បីក្រពះ តែលក់សល់ខាតរាល់ថ្ងៃ

មហាជនជាច្រើនបានស្គាល់ហើយ តាចេក ដែលធ្លាប់ជាតារាកំប្លែងជើងចាស់ដ៏មានប្រជាប្រិយភាពមួយរូប ប៉ុន្តែមួយរយៈធំចុងក្រោយនេះ លោកហាក់បាត់មុខពីការសម្ដែងកំប្លែងលើកញ្ចក់ទូរទស្សន៍ផ្សេងៗ ដែលគេបានឃើញថាកន្លងមកនេះ លោកកំពុងរស់នៅក្នុងជីវិតដែលមានជីវភាពលំបាកខ្លាំង ដោយលោកស៊ូប្រកបរបរលក់ភេសជ្ជៈ និង លក់ផ្លែឈើតាមដងផ្លូវ។

ដោយឡែក ថ្មីៗនេះ លើបណ្ដាញសង្គមរបស់ តារាកំប្លែងជើងចាស់រូបនេះ បានបង្ហោះសារត្អូញត្អែរប្រាប់ដល់មហាជន ខណៈដែលលោកស៊ូចេញលក់ផ្លែឈើឆ្ងាយពីផ្ទះដាក់លក់តាមដងផ្លូវ ប៉ុន្តែហាក់មិនកាក់កប មិនបានប្រាក់ចំណេញ ថែមទាំងខាតដើមទៀត។

ក្នុងនោះ តាចេក បានរៀបរាប់ថា ៖ «ខំមកចោលផ្ទះមករកស៊ីក្រែងបានចំណេញខ្លះ តែចាប់ពីមកលក់ដូចជាមិនសូវកាក់កបសោះ ចេះតែខាតរហូតអ៊ីចឹង បើនៅតែអ៊ីចឹងទៀតមិនដឹងនៅលក់បន្ត ឬទៅផ្ទះវិញទេបងប្អូនអើយ បើសល់រហូតចឹងនោះ»។

គួរឱ្យដឹងផងដែរថា របររកស៊ីរបស់តារាកំប្លែងរូបនេះកន្លងមក លោកដាក់លក់ភេសជ្ជៈនៅតាមបណ្ដោយផ្លូវជាតិលេខ ២ ផ្លូវទៅទន្លេបាទី ម្ដុំហួសរង្វង់មូលគួរស្រូវ ហើយសព្វថ្ងៃនេះលោកដាក់លក់ផ្លែឈើនៅតាមដងផ្លូវឡើងទៅរមណីយដ្ឋានគិរីរម្យ៕