ស្រឡាញ់គ្នា ៦ ឆ្នាំ ទីបំផុតគូស្នេហ៍តារាល្បី Kim Woo Bin និង Shin Min Ah ធ្លាយដំណឹងរៀបការហើយ

​ប្រិយមិត្តមហាជនអ្នកគាំទ្រជាច្រើន ប្រាកដជាស្គាល់មកហើយ នូវគូស្នេហ៍តារាសម្តែងកំពូលផ្អែមល្ហែមប្រចាំវិស័យសិល្បៈកូរ៉េ ស្រីស្រស់ Shin Min Ah និង កំលោះសង្ហា Kim Woo Bin ដែលបានសំងំសាងស្នេហ៍ស្អិតល្មួតជាមួយគ្នាតាំងពីឆ្នាំ ២០១៥ មកម៉្លេះ។

យ៉ាងណាមិញ តាំងពីបានចាប់ដៃគ្នាមក គូស្នេហ៍មួយគូនេះ ហាក់បានកញ្ឆក់បេះដូងអ្នកគាំទ្រមិនតិចនោះទេ ដោយសារតែភាពស័ក្តិសមឥតខ្ចោះរបស់ទាំងគូ ជាមួយនឹងការចេះតស៊ូទ្រាំជាមួយគ្នាក្នុងឧបសគ្គលំបាករបស់ពួកគេផងទៀតនោះ។

ជាក់ស្តែង នៅពេលដែលតារាប្រុស Kim Woo Bin បានធ្លាក់ខ្លួនកើតជំងឺមហារីកបំពង់កនៅអំឡុងឆ្នាំ ២០១៧ តារាស្រី Shin Min Ah ជាសង្សារពិតជាមិនបានបោះបង់លោកឡើយ នាងតែងនៅក្បែរឱ្យកម្លាំងចិត្ត និង​​ មើលថែរលោកលោកជានិច្ច ដោយគេតែងតែឃើញនាងជូនសង្សារសំណព្វទៅមន្ទីរពេទ្យមិនដែលខានឡើយ រហូតដល់តារាប្រុស Woo Bin ជាសះស្បើយនៅឆ្នាំ ២០១៩ នេះឯង។

ចំណុចទាំងនេះ កាន់តែធ្វើឱ្យអ្នកគាំទ្រទាំងឡាយរំជួលចិត្តអត់សរសើរមិនបានឡើយ ម្នាក់ៗពិតជានៅមិនសុខរំអុកចង់ឱ្យតែទាំងគូនេះ បានចាប់ដៃគ្នាជាគ្រួសារឆាប់ៗតែម្តង។ យ៉ាងណាមិញ ក្តីស្រមៃរបស់អ្នកគាំទ្រហាក់កំពុងតែរំកិលមកជិតដល់ហើយ ដោយថ្មីៗនេះ មានប្រភពចចាមអារ៉ាមជាច្រើនឱ្យដឹងថា​ តារាប្រុសស្រីទាំងពីរនេះ កំពុងតែរៀបចំគម្រោងរៀបការសាងគ្រួសារជាមួយគ្នា នៅខែវិច្ឆិកា ឆ្នាំ ២០២១ នេះហើយ ក្រោយពីបានទាក់ទងមើលចិត្តគ្នាអស់ជិត ៦ ឆ្នាំនោះ។

ចចាមអារ៉ាមមួយនេះ រឹតតែធ្វើឱ្យអ្នកគាំទ្រកាន់តែរំភើបរំជើបរំជួលមួយកម្រិតទៀតតែម្តង ព្រោះពួកគេពិតជាប៉ងចង់ឃើញគូមួយនេះ ផ្លាស់ប្តូរពីសង្សារទៅជាស្វាមីភរិយាជាយូរមកហើយ។ យ៉ាងណាមិញ សាមីខ្លួនទាំងពីរនាក់ នៅមិនទាន់បានចេញមុខមកស្រាយបញ្ជាក់នៅឡើយទេ តែមហាជនពិតជាសង្ឃឹមនឹកបន់ឱ្យរឿងនេះក្លាយជាការពិតណាស់៕