គាំងនិយាយលែងចេញ! សូ ដានីតា តបវិញម៉ាឆ្ងាញ់ ពេលគេសួរថា តារាៗសម្បូររឿងម៉េស

រឿងរ៉ាវរវាងតារាសម្ដែង សូ ដានីតា បង្ហោះសារនៅលើគណនីហ្វេសប៊ុក ប្រកាសសួររកតារាសម្ដែង សឿ សុធារ៉ា ឱ្យដោះស្រាយជាបន្ទាន់បើមិនចង់ត្រូវដីកាកោះហៅ ឬ ត្រូវអញ្ជើញឱ្យចូលប៉ុស្ដិ៍ប៉ូលិស កំពុងផ្ទុះការភ្ញាក់ផ្អើលយ៉ាងខ្លាំងដល់អ្នកដែលនិយមតាមដានជីវិតអ្នកសិល្បៈ ជាពិសេសមហាជនអ្នកប្រើប្រាស់បណ្ដាញសង្គមហ្វេសប៊ុកផ្ទាល់តែម្ដង។

ការបង្ហោះជាសាធារណៈរបស់តារាសម្ដែង សូ ដានីតា ធ្វើឱ្យអ្នកលេងហ្វេសប៊ុកជាច្រើនបាននាំគ្នាចូលបញ្ចេញយោបល់សួរនាំ ហើយក្នុងនោះគេចាប់អារម្មណ៍អ្នកលេងហ្វេសប៊ុកម្នាក់ បានសួរទៅ សូ ដានីតា តាមរយៈខំមិន (comment) ថា ៖ «មួយរយៈនឹងខាងតារាៗសម្បូររឿងណាស់»។ ការលើកឡើងខាងលើ ដោយមើលឃើញថា មួយរយៈនេះ អ្នកសិល្បៈមួយចំនួនជាក់ស្ដែងដូចជារឿង តារាកំប្លែង ខ្ញុង ជាដើម បានផ្ទុះល្បីពេញហ្វេសប៊ុក។

ក្រោយបានឃើញការបញ្ចេញយោបល់របស់អ្នកលេងហ្វេសប៊ុកខាងលើ តារាស្រី សូ ដានីតា មិននៅបង្អង់យូរ ដោយអ្នកនាងបានឆ្លើយតបទៅវិញយ៉ាងខ្លី តែមានន័យកុំឱ្យមានមន្ទិលសង្ស័យតទៅទៀតថា ៖ «អ្នកណាក៏ចេះមានរឿងដែរ តារាក៏ជាមនុស្ស»៕