មិនទាន់លែងប្ដីដាច់ផង Kim Kardashian ត្រូវគេចោទថាកំពុងផ្អែមជាមួយនឹងអតីតគូដណ្ដឹង Ariana Grande
កាលពីពេលថ្មីៗកន្លងទៅនេះ តារាទូរទស្សន៍ Kim Kardashian និងតារាសម្ដែង Pete Davidson បានធ្វើឱ្យមហាជនជាច្រើនចាប់អារម្មណ៍ និងសង្ស័យពីទំនាក់ទំនងរបស់ពួកគេ ក្រោយធ្វើការសម្ដែងរួមគ្នាជាតួអង្គ Jasmine និង Aladdin ក្នុងកម្មវិធី Saturday Night Live ដោយបង្ហាញភាពស្និទ្ធស្នាលថើបគ្នាប្រៀបដូចគូស្នេហ៍ពិតៗ។
ក្រោយមក តារាមួយគូនេះ កាន់តែធ្វើឱ្យអ្នកគាំទ្រសង្ស័យជាងមុនទៅទៀត ក្រោយពួកគេត្រូវបានប្រទះឃើញទៅសួនកម្សាន្តដើរលេងជាមួយគ្នា ថែមទាំងជិះ roller coaster កាន់ដៃគ្នាយ៉ាងស្អិតទៀតផង។
បើតាមប្រភពពីសារព័ត៌មាន Hollywood Life បានឱ្យដឹងថា តារាសម្ដែង Pete Davidson និង Kim Kardashian គឺតាមពិតជាមិត្តល្អនឹងគ្នានោះទេ តែទោះជាយ៉ាងណា តាមរយៈសកម្មភាពរបស់ពួកគេនាពេលថ្មីៗនេះ គឺហាក់បង្ហាញឱ្យមហាជនយល់ឃើញថា ពួកគេគឺមានទំនាក់ទំនងលើសពីមិត្តភក្តិ។
គួរបញ្ជាក់ថា Kim Kardashian បានដាក់ពាក្យលែងលះគ្នាជាមួយនឹងអតីតស្វាមីរបស់នាង Kanye West រយៈពេល ៨ ខែមកហើយ ប៉ុន្តែនៅមិនទាន់ប្រកាសជាផ្លូវការដាច់ស្រេចនៅឡើយទេ។ ដោយឡែក Pete Davidson វិញ មហាជនជាច្រើនក៏ស្គាល់ដែរថា ជាតារាកំប្លែងដ៏ល្បីប្រចាំកម្មវិធី Saturday Night Live ហើយមួយវិញទៀត លោកក៏ធ្លាប់បានភ្ជាប់ពាក្យជាគូដណ្ដឹងនឹងតារាចម្រៀង Ariana Grande កាលពីឆ្នាំ ២០១៨ ផងដែរ ប៉ុន្តែល្អូកល្អិនគ្នាបានត្រឹម ៦ ខែ ពួកគេក៏ប្រកាសចែកផ្លូវគ្នារៀងខ្លួន៕
