Kim Soo Hyun មានទំនាក់ទំនងពិសេសមួយ ជាមួយនឹងកំពូលតារាស្រី ២ រូប
តាំងពីឈានជើងចូលវិស័យសិល្បៈមក កំពូលតារាប្រុសសង្ហាជួរមុខ Kim Soo Hyun ក៏មិនដែលអត់នោះទេ នូវរឿងចចាមអារ៉ាមស្នេហានាយអាយ ជាមួយតារាស្រីរួមអាជីពផ្សេងៗទៀតនោះ ដោយសារតែកាយវិការ និងភាពស្និទ្ធស្នាលនៅលើកញ្ចក់ទូរទស្សន៍។
យ៉ាងណាមិញ ក្នុងនោះ ក៏មានតារាស្រីល្បីៗពីរនាក់ផងដែរ ដែលធ្លាប់ចចាមអារ៉ាមស្នេហា ក៏ដូចជាត្រូវហ្វេនៗចំអន់ជាមួយកំលោះមុខផ្អែមរូបនេះ ប៉ុន្តែតាមពិតទៅទំនាក់ទំនងរបស់ពួកគេមិនមែនទាក់ទងនឹងរឿងស្នេហាស្នេហ៍ហឺតនោះទេ តែជាទំនាក់ទំនងម៉្យាង ដែលធ្វើឱ្យអ្នកគាំទ្រកក់ក្តៅរំជួលចិត្តមួយបែបទៅវិញ។
តារាប្រុស Kim Soo Hyun ធ្លាប់មានព័ត៌មានចចាមអារ៉ាមស្នេហាជាមួយនឹងតារាស្រី IU និង Suzy ហើយពេលនោះហ្វេនៗក៏រឹតតែនាំគ្នាសប្បាយចិត្តរំភើបទៅថែមទៀត ព្រោះពួកគេគឺមើលទៅពិតស័ក្ដិសមនឹងគ្នាមិនតិចនោះទេ ប៉ុន្តែតាមពិតទៅពួកគេគឺសុទ្ធតែជាមិត្តភក្ដិជិតស្និទ្ធស្គាល់ចិត្តគ្នារាប់ឆ្នាំទៅវិញសោះ។
កំលោះ Kim Soo Hyun ជាមួយក្រមុំ IU និង Suzy បានចាប់ផ្តើមស្គាល់គ្នាតាំងពីឆ្នាំ ២០១១ មកម្ល៉េះ ពោលគឺស្គាល់គ្នានៅក្នុងការសម្តែងរឿងភាគកូរ៉េ Dream High ។ ចាប់តាំងពីបានបង្ហាញខ្លួនក្នុងរឿងនេះជាមួយគ្នារួចមក ពួកគេក៏រឹតតែមានភាពស្និទ្ធស្នាលទៅៗ ហើយកាន់តែយល់ចិត្តគ្នាថែមទៀត ដោយតែងទៅណាមកណា និង ផ្ញើសារទាក់ទងចុះឡើងជាមួយគ្នាមិនដាច់ឡើយ រហូតធ្វើឱ្យមហាជនអ្នកគាំទ្រនឹកគិតថា នេះទំនាក់ទំនងបេះដូងតែម្តង ប៉ុន្តែវាគ្រាន់តែជាចំណងមិត្តភាពដ៏កក់ក្តៅមួយរវាងគ្នាប៉ុណ្ណោះ។
ក្រោយមក ពួកគេក៏បានលេចមុខនៅក្នុងរឿងថ្មីជាមួយគ្នាម្តងទៀត ជាពិសេសគឺ រឿងភាគ Hotel Deluna ដែលមាន Kim Soo Hyun និង IU សម្តែងជាមួយគ្នា ជាហេតុធ្វើឱ្យអ្នកគាំទ្រនឹកឃើញដល់ទំនាក់ទំនងមិត្តភាពរបស់ពួកគេតែម្តង។
យ៉ាងណាមិញ អ្នកគាំទ្រក៏ពេញចិត្តចំពោះទំនាក់ទំនងមួយនេះណាស់ ហើយពួកគេមិននឹកស្មានថា តារាប្រុស និងតារាស្រីអាចមានភាពជិតស្និទ្ធគ្នាដល់ថ្នាក់នេះឡើយ៕
