កាន់តែកៀកថ្ងៃជ័យ នៅ ស៊ីនឿន បញ្ចេញកម្រងរូបភាព Pre-wedding ស្ទីលស្អាតៗញាក់សាច់

ធ្មេចបើកៗរយៈជិត ៣ ឆ្នាំ ហើយ ដែលតារាចម្រៀងលោក នៅ ស៊ីនឿន បានស្វែងរកឃើញម្ចាស់បេះដូង ព្រមទាំងបានដឹកដៃគ្នាភ្ជាប់ពាក្យកាលពីអំឡុងខែធ្នូ ឆ្នាំ ២០១៨ មក ជាមួយនឹងនារីអនិកជនប្រទេសបារាំងដ៏ស្រស់សោភា។ ក្នុងនោះដែរ ក្រោយពីបានប្តូរងារទៅជាគូដណ្តឹងហើយនោះ លោក នៅ ស៊ីនឿន និង អនាគតភរិយា ក៏បានបង្ហាញភាពផ្អែមល្ហែម និង រស់នៅជាគូយ៉ាងមានសុភមង្គលផងដែរ។

យ៉ាងណា​មិញ ក្រោយពីភ្ជាប់ពាក្យអស់រយៈពេលជិត ៣ ឆ្នាំ និង តែងមានការសួរនាំ ទន្ទឹងរង់ចាំពីមិត្តភក្តិពេលណាលោក នៅ ស៊ីនឿន និង គូដណ្តឹងដឹកដៃគ្នាចូលរោងការនោះ មកដល់អំឡុងចុងខែតុលា ឆ្នាំ ២០២១ កន្លងទៅ តារាចម្រៀងប្រុសរូបនេះ ក៏បានបង្ហើបឱ្យដឹងហើយថា លោក និង អនាគតភរិយាត្រៀមចូលរោងការនៅខែធ្នូ ឆ្នាំ ២០២១ ខាងមុខនេះ។

ជាក់ស្តែងនៅដើមខែវិច្ឆិកា ឆ្នាំ ២០២១ លោក នៅ ស៊ីនឿន និង គូដណ្តឹងបានដឹកដៃគ្នាទៅថត Pre-wedding ជាច្រើនខេត្ត ដោយមានដូចជាទឹកដីខេត្តសៀមរាប កោះរ៉ុង មណ្ឌលគីរី និង ទីក្រុងភ្នំពេញ ជាដើមនោះ ហើយនៅថ្ងៃទី ០៣ ខែវិច្ឆិកា ឆ្នាំ ២០២១ លោក នៅ ស៊ីនឿន ក៏បានបង្ហោះរូបភាព Pre-wedding របស់ខ្លួនហើយដែរនៅលើគណនីហ្វេសប៊ុក ដោយមើលទៅពិតជាស្រស់ស្អាត និង​ ស័ក្ដិសមជាគូនឹងគ្នាយ៉ាងខ្លាំង។

លើសពីនោះ អ្វីដែលកាន់តែធ្វើឱ្យអ្នកលេងបណ្តាញសង្គមហ្វេសប៊ុកលាន់មាត់សរសើរថែមទៀតនោះ គឺលោក នៅ ស៊ីនឿន មិនត្រឹមតែមានការជ្រើសរើសការតុបតែងខ្លួនថតទាំងឈុតបុរាណ និង សម័យនោះឡើយ ពោលគឺលោកបានចំណាយទឹកប្រាក់មិនតិចនោះទេ ក្នុងការថត Pre-wedding ក៏ព្រោះតែមានទាំងការជួលអូប័រ កប៉ាល់ដ៏ធំ ព្រមទាំង Private Jet ទៀតផង៕