អ្នកគ្រប់គ្រង MUC ទម្លាយរឿងមួយទាំងស្រណោះ ក្រោយម្ដាយក្មេកទទួលមរណភាព

នៅល្ងាចថ្ងៃទី ១២ ខែវិច្ឆិកា ឆ្នាំ ២០២១ នេះ អ្នកគ្រប់គ្រងស្ថាប័ន Miss Universe Cambodia បានបង្ហោះសារឱ្យដឹងថា លោកកំពុងជួបទុក្ខក្រៀមក្រំ ដោយម្ដាយក្មេករបស់លោកបានទទួលមរណភាព។

សារនោះ អ្នកគ្រប់គ្រងស្ថាប័ន Miss Universe Cambodia ដែលគេស្គាល់ឈ្មោះ ម៉ែន និមលរ័ត្ន បានសរសេរថា ៖«សូមឱ្យវិញ្ញាណក្ខន្ធម៉ាក់ក្មេកបានទៅដល់ឋានសុគតិភព!»។

ក្រោយពីទទួលដំណឹងមរណភាពនេះ មហាជន ជាពិសេសអ្នកគាំទ្រវិស័យកញ្ញាឯក បានសម្ដែងនូវការសោកស្ដាយ និង ចូលរួមរំលែកទុក្ខដល់លោក និង ក្រុមគ្រួសារផងដែរ។

ដោយឡែក នៅថ្ងៃដដែលនេះ ក្រោយពីរៀបចំពីធីបុណ្យសព្វម្ដាយក្មេកហើយ អ្នកគ្រប់គ្រងស្ថាប័ន MUC រូបនេះ ក៏បានបង្ហោះសាររៀបរាប់យ៉ាងសោកសៅពីសេចក្ដីអាណិតអាល័យដល់ម្ដាយក្មេក ជាពិសេសបានបង្ហាញពីទំនាក់ទំនងរវាងឪពុកក្មេក ម្ដាយក្មេក និង កូនប្រុសជាទីស្រឡាញ់របស់លោកទៀតផង។

សារដ៏សោកសៅនោះ អ្នកគ្រប់គ្រង MUC បានរៀបរាប់ថា ៖ «ប៉ាក្មេកខ្ញុំគាត់ស្រឡាញ់ប្រពន្ធ និង កូនៗណាស់ ពេលចែកឋានទៅ គាត់បានមកចាប់កំណើតក្នុងផ្ទៃកូនស្រីគាត់ ដែលជាកូនប្រុសទីពីររបស់ខ្ញុំ ហើយបាននៅជួបជុំគ្នាបានរយៈពេលជិត ១០ ឆ្នាំ នៅខ្វះតែ ៤ ថ្ងៃទៀត ដល់ខួបឋានន្តរ៍ ១០ ឆ្នាំហើយ តែពេលនេះម៉ាក់ក្មេកបានលាទៅហើយ»៕