កំពូលតារាជើងចាស់ Kim Young OK អាយុ ៨៤ ឆ្នាំហើយ នៅតែត្រូវប៉ាន់!

ប្រិយមិត្តអ្នកនិយមទស្សនាតាមដានរឿងភាគរបស់កូរ៉េខាងត្បូង ពិតណាស់ប្រាកដជាចាំមុខ និង ស្គាល់លោកយាយ Kim Young OK ជាក់ជាមិនខាន ព្រោះតារាសម្តែងជើងចាស់រូបនេះ បានលេចមុខនៅក្នុងរឿងភាគល្បីៗមិនតិចជាងរាប់សិបរឿងនោះទេ។

យ៉ាងណាមិញ លោកយាយពិតជាទទួលបានប្រជាប្រិយភាព និង ការគោរពស្រឡាញ់ខ្លាំងណាស់ក្នុងនាមជាតារាសម្តែងជើងចាស់មួយរូប ជាពិសេសគឺពីសំណាក់ប្រជាជនកូរ៉េខាងត្បូង ដោយគេបានចាត់ទុកលោកយាយជា «លោកយាយប្រចាំជាតិ» ថែមទៀត។

ដោយឡែក បើគិតត្រួសៗ លោកយាយ Kim Young OK បានប្រឡូកសិល្បៈអស់ជាង ៦៤ ឆ្នាំមកហើយ ពោលគឺតាំងពីឆ្នាំ ១៩៥៤ នៅពេលដែលគាត់មានអាយុ ១៩ ឆ្នាំ រហូតមកដល់ពេលនេះ គឺលោកយាយមានអាយុជាង ៨៤ ឆ្នាំទៅហើយ។

បើទោះជាមានវ័យជរាបន្តិចក៏ពិតមែន តែកម្លាំងកាយ​ និង កម្លាំងចិត្តរបស់លោកយាយហាក់មិនថមថយឡើយ ជាហេតុធ្វើឱ្យលោកយាយនៅតែអាចបន្តបំពេញកាងារជាអ្នកសម្តែងបានមិនមានអ្វីជាឧបសគ្គនោះទេ ជាពិសេសនោះ គឺខាងអ្នកដឹកនាំរឿងក៏រឹតតែត្រូវការលោកយាយផងដែរ ព្រោះសម្រាប់តួអង្គចាស់ជរានៅក្នុងរឿង គឺលោកយាយអាចសម្តែងបានល្អឥតខ្ចោះតែម្តង។

ដោយឡែក ជាមួយនឹងភាពកាក់កបហូរហែក្នុងសិល្បៈបែបនេះ លោកយាយ Kim Young OK ត្រូវបានគេប៉ាន់ស្មានដឹងថា បានទាញលុយកាក់ទ្រព្យសម្បត្តិបានរហូតដល់ជាង ៥ លានដុល្លារឯណោះ ដោយគ្រាន់តែដើរជាតួសម្តែងចាស់ជរានៅក្នុងរឿងតែមួយភ្លែតៗប៉ុណ្ណោះ។

យ៉ាងណាមិញ មហាជនអ្នកគាំទ្រពិតជាស្រឡាញ់គាំទ្រលោកយាយមិនដាច់នោះទេ ហើយគេក៏តែងតែជូនពរឱ្យគាត់នៅតែមានសុខភាពល្អ អាចបន្តនៅជាគំរូដ៏ល្អដល់សិល្បៈករជំនាន់ក្រោយៗផងដែរ៕