![ឃើញស្រឡាញ់គ្នាប្ដូរផ្ដាច់ តែគូស្នេហ៍តារាប៉ុន្មានដួងនេះ ត្រូវបញ្ចប់ពាក្យថាសង្សារក្នុងឆ្នាំ ២០២១](https://www.popular.com.kh/wp-content/uploads/2021/11/SP3-1.jpg)
ឃើញស្រឡាញ់គ្នាប្ដូរផ្ដាច់ តែគូស្នេហ៍តារាប៉ុន្មានដួងនេះ ត្រូវបញ្ចប់ពាក្យថាសង្សារក្នុងឆ្នាំ ២០២១
ក្នុងពិភពសិល្បៈថៃ អំឡុងឆ្នាំ ២០២១ នេះ មានរឿងរ៉ាវមិនចេញចប់នោះទេ ចំពោះអ្នកសិល្បៈ ជាពិសេសរឿងរ៉ាវស្នេហ៍បែកបាកតែម្តង ដោយមហាជនជាច្រើនស្ទើរតែទទួលយកពុំបាននោះទេ បន្ទាប់ពីតារាក្នុសិល្បៈថៃជាច្រើនគូបានសម្រេចចិត្តលែងដៃគ្នា បញ្ចប់ជីវិតស្នេហ៍ដែលខំសាងរាប់ឆ្នាំ ព្រោះតែហេតុផលដ៏មិននឹកស្មានទាំងអស់នេះទៅវិញ។ ជាពិសេស គូស្នេហ៍តារា ៤ ដួងនេះ ដែលកំពុងតែធ្វើឱ្យអ្នកគាំទ្រស្រឡាំងកាំងរកនិយាយអ្វីមិនត្រូវ ពេលបានឮដំណឹងបែកបាក់ស្នេហារបស់ពួកគេ។ គូស្នេហ៍តារា ៤ ដួងនោះរួមមាន ៖
១. តារាស្រី Bow Maylada និង តារាប្រុស Mik Thongraya
នៅថ្ងៃទី ១៧ ខែសីហា ឆ្នាំ ២០២១ កន្លងទៅនេះ មហាជនអ្នកគាំទ្រស្រឡាំងកាំងយ៉ាងខ្លាំង ក្រោយគូស្នេហ៍របស់តារាស្រី Bow Maylada និង Mik Thongraya បានចេញមុខប្រកាសជាសាធារណៈបញ្ចប់ចំណងស្នេហ៍ជិត ៤ ឆ្នាំខំសាងរួមគ្នា ដោយសារហេតុផលមិនចុះសម្រុងគ្នា។ ជុំវិញរឿងរ៉ាវបែកនេះដែរ មហាជននៅតែសង្កត់ខ្លាំងទៅលើ Mik Thongraya ដែលលោកជាអ្នកសុំបែកគូស្នេហ៍រហូតដល់ទៅ ៥ ដងឯណោះ។
២. តារាប្រុស Turk Natchanon និង តារាស្រី Ben Raviyanun
ដោយឡែក នៅថ្ងៃទី ៩ ខែវិច្ឆិកា ឆ្នាំ ២០២១ កន្លងទៅនេះវិញ មហាជនមានក៏រឹតតែមានការភ្ញាក់ដូចគ្នា បន្ទាប់ពីធ្លាយដំណឹងថាចំណងស្នេហ៍ ៤ ឆ្នាំ របស់តារាប្រុស Turk Natchanon និង តារាស្រីរូបស្រស់ Ben Raviyanun បានបញ្ចប់ ដោយបន្សល់ទុកឈ្មោះត្រឹមមិត្ត ព្រោះតែហេតុផលមិនចុះសម្រុងដូចទៅនឹងតារាប្រុស Mik និង Bow ដែរ។
៣.តារាស្រី Min Pechaya និង oat Pithak
នៅថ្ងៃទី ១៧ ខែវិច្ឆិកា ឆ្នាំ ២០២១ កន្លងទៅ ជាថ្ងៃដែលតារាស្រី Min Pechaya បានចេញមុខជម្រះមន្ទិលសង្ស័យនៅចំពោះមុខមហាជនកុំឱ្យមានការសង្ស័យចំពោះគូស្នេហ៍របស់អ្នកទាំងពីរថា ពេលនេះនាង និង គូស្នេហ៍បានបែកគ្នាជាផ្លូវការហើយ គ្រាន់តែកន្លងមកនាងមិនបានចេញមុខបកស្រាយប៉ុណ្ណោះ តែពេលនេះនាងសូមបញ្ជាក់ថា នាងនៅ Single ហើយ។
៤. តារាប្រុស Weir Sukollawat និង តារាស្រី Bella Ranee
ចំណែកនៅថ្ងៃទី ២៦ ខែវិច្ឆិកា ឆ្នាំ ២០២១ នេះវិញ មហាជនកំពុងតែជ្រួលច្របល់ និង សោកស្តាយខ្លាំងណាស់ ខណៈពេលដែលឮដំណឹងថា តារាប្រុសរូបសង្ហា Weir Sukollawat និង តារាស្រី Bella Ranee បានបញ្ចប់ទំនាក់ទំនងស្នេហ៍ ៩ ឆ្នាំ ដែលខំសាងជាមួយគ្នា ពោលគឺអ្នកទាំងពីរបានបែកគ្នាហើយពេលនេះ ដោយសារតែការមិនចុះសម្រុងនឹងគ្នា។ ពេលនេះអ្នកទាំងពីរនៅសល់ត្រឹមឈ្មោះជាបងប្អូននឹងគ្នាប៉ុណ្ណោះ៕