អ្នកគាំទ្រនឹករឭកខ្លាំង ក្រោយឃើញរូបថត ទូច ស៊ុននិច និង តារាជើងចាស់រូបនេះ កាលជាង ២០ ឆ្នាំមុន

បើរំឭកដល់តារាចម្រៀងស្រីរៀមច្បងដែលមានទឹកដមសំឡេងផ្អែមពីរោះ រណ្ដំដួងចិត្ត អាចឆក់បានបេះដូងទស្សនិកជនទាំងក្មេងចាស់ប្រុសស្រី ឱ្យសញ្ជឹងស្ដាប់នូវសូរសៀងដ៏លន្លង់លន្លោចដក់ជាប់ក្នុងសតិអារម្មណ៍មិនចង់ឃ្លាតឆ្ងាយ នោះគេជឿថា ប្រិយមិត្តភាគច្រើនប្រាកដជានឹកដល់សំឡេងច្រៀងដ៏ពីរោះរបស់តារាចម្រៀង ទូច ស៊ុននិច មិនខាន។

តែយ៉ាងណាគួរឱ្យសោកស្ដាយ ទូច ស៊ុននិច បានឃ្លាតកាយឆ្ងាយពីវិថីសិល្បៈចម្រៀងរាប់ឆ្នាំមកហើយ បន្សល់នូវតែអនុស្សាវរីយ៍ទឹកដមសំឡេងក្នុងបទចម្រៀងចាស់ៗតែប៉ុណ្ណោះ។ រៀមច្បង ទូច ស៊ុននិច មិនអាចបង្ហើរសំនៀងច្រៀងបំពេអារម្មណ៍ទស្សនិកជនដូចកាលពីមុនបាន ប៉ុន្ដែកេរ្ដិ៍ឈ្មោះរបស់តារាស្រីរូបនេះ នៅតែត្រូវបានក្មេងៗជំនាន់ក្រោយស្គាល់ និង នឹករឭកដល់ជារឿយៗ។

តួយ៉ាងថ្មីៗនេះ មានគណនីមួយដាក់ឈ្មោះTouch Sunnix ស្រាប់តែបង្ហោះរូបថតចាស់មួយសន្លឹកកាលពីឆ្នាំ ១៩៩៩ កាលនាងកំពុងច្រៀងឆ្លើយឆ្លងរួមគ្នាជាមួយតារាជើងចាស់ ថោង តារាឆាយ៉ា លើទឹកដីសហរដ្ឋអាមេរិក ធ្វើឱ្យមហាជនអ្នកប្រើប្រាស់បណ្ដាញសង្គមហ្វេសប៊ុកជាច្រើន កើតមានក្ដីនឹករឭកដល់វត្តមានកញ្ញាជាពន់ពេក។

ក្រៅពីបង្ហាញរូបថតចាស់មួយសន្លឹកធ្វើឱ្យមហាជននឹករឭកហើយនោះ ទូច ស៊ុននិច ក៏បានរៀបរាប់ថា ៖ «រូបនេះពេលដែលនាងខ្ញុំសម្ដែង Concert រួមជាមួយលោកពូ ថោង តារាឆាយ៉ា នៅប្រទេសអាមេរិក Washington State ឆ្នាំ១៩៩៩ ខ្ញុំនឹករឭកដល់បងប្អូនទាំងអស់គ្នាណាស់ និងសូមជូនពរបងប្អូនមានសុខភាពល្អគ្រប់ៗគ្នា»៕