មុនជួបរឿងអាក្រក់ផ្ទួនៗ Paing Takhon ធ្លាប់ទម្លាយអារម្មណ៍ថា ពេញចិត្តតារាស្រីថៃរូបនេះខ្លាំង

តារាសម្ដែងប្រុសលោក Paing Takhon ត្រូវបានតុលារដ្ឋាភិបាលយោធាបានសម្រេចកាត់ទោសឱ្យជាប់ពន្ធនាគាររយៈពេល ៣ ឆ្នាំ និង ត្រូវទទួលរង់ទណ្ឌកម្មដោយធ្វើពលកម្មកម្លាំងបាយយ៉ាងដំណំ ស្របពេលដែលស្ថិតក្នុងការឃុំឃាំងនោះ។

ជាមួយនឹងដំណឹងនេះ ពិតធ្វើឱ្យមហាជនច្រើនណាស់សម្ដែងការអាណិតយ៉ាងខ្លាំងទៅកាន់តារាប្រុសរូបសង្ហាមីយ៉ាន់ម៉ាម្នាក់នេះ។ លោក Paing Takhon គឺជាតារាសម្ដែង និង ម៉ូដែលមីយ៉ាន់ម៉ាដ៏មានប្រជាប្រិយភាពម្នាក់ក្នុងវិស័យសិល្បៈ។ មិនត្រឹមតែមហាជនក្នុងស្រុកប៉ុណ្ណោះទេដែលស្រឡាញ់គាំទ្រលោកនោះ សូម្បីអ្នកគាំទ្រក្រៅស្រុកក៏ពេញចិត្ត និង ស្រឡាញ់តារាប្រុសសង្ហារូបនេះដូចគ្នា ជាពិសេសអ្នកគាំទ្រក្នុងប្រទេសថៃ។

តើអ្នកធ្លាប់ដឹងទេថា មុនពេលមានរឿង តារាប្រុស Paing Takhon បានមានឱកាសការងារក្នុងប្រទេសថៃ ថែមទាំងបានលួចពេញចិត្តតារាស្រីថៃម្នាក់ថែមទៀតផង។ តារាសម្ដែង និង ម៉ូដែល Paing Takhon ធ្លាប់ទម្លាយអារម្មណ៍របស់ខ្លួនថា មនុស្សស្រីក្នុងក្ដីស្រមៃរបស់លោកគឺជាមនុស្សស្រីដែលមានលក្ខណៈសម្បត្តិដូចទៅនឹងតារាស្រីស្រស់ Baifern។ មូលហេតុដែលតារាប្រុស Paing Takhon ហ៊ាននិយាយបែបនោះក៏ព្រោះតែលោកធ្លាប់បានរួមការងារជាមួយតារាស្រីស្រស់ Baifern។

ជាមួយនឹងការទម្លាយកាលនោះ ពិតបានធ្វើឱ្យមហាជនថៃជាច្រើនរំភើបចិត្ត និង ធ្លាប់បានចាប់ផ្គូផ្គងតារាស្រីប្រុសពីរដួងនេះឱ្យស្រឡាញ់គ្នាមែនទែន ដល់ក្រោយមកលោក Paing Takhon មានរឿងរ៉ាវទៅ ការផ្គូផ្គងនោះក៏ហាក់ជារសាត់បាត់ទៅ៕