Bam Bam ស្រាប់តែពន្លះពាក្យក្នុងចិត្ត ធ្វើឱ្យហ្វេនៗថៃកើតអារម្មណ៍នេះគ្រប់គ្នា ក្រោយខានចូលប្រទេស ២ ឆ្នាំ
កាលពីរាត្រីឆ្លងឆ្នាំថ្មី ថ្ងៃទី ៣១ ខែធ្នូ ឆ្នាំ ២០២១ កន្លងទៅនេះ កំពូលតារាប្រុស K-Pop Bam Bam សមាជិកម្នាក់ក្នុងក្រុម Got 7 បានមកបើកព្រឹត្តិការណ៍ Concert ឆ្លងឆ្នាំនៅឯប្រទេសរបស់ខ្លួនក្នុងខេត្ត Pattaya ប្រទេសថៃ ក្រោយពីខកខានមកលេងប្រទេសកំណើតអស់រយៈពេល ២ ឆ្នាំពេញ។
ជាមួយនឹង Concert នោះ គេឃើញមានហ្វេនៗ ក្រុម Got 7 ជាច្រើនបានចូលរួមស្ទើរតែគ្មានកន្លែងអង្គុយទស្សនាផង ដោយអ្នកខ្លះរង់ចាំទស្សនាតាំងតែព្រលឹម។ ជាមួយនឹងមានឱកាសត្រឡប់ពីប្រទេសកូរ៉េចូលទៅបើកឆាក Concert ឆ្លងឆ្នាំក្នុងប្រទេសខ្លួន Bam Bam ពិតជាមានអារម្មណ៍សប្បាយរីករាយ និង រំភើបណាស់។
មិនត្រឹមប៉ុណ្ណោះ តារាប្រុសរូបនេះក៏បានចូលរូមក្នុងកម្មវិធី Fan Metting ផងដែរ នៅទីក្រុងបាងកក ដើម្បបង្ហាញពីភាពស្និទ្ធស្នាល និង ចំណាប់អារម្មណ៍ខ្លះទៅកាន់អ្នកគាំទ្ររបស់លោក។ នៅលើឆាកបន្ទាប់ពីសម្ដែងចប់ Bam Bam ក៏បាននិយាយទាំងក្តុកក្ដួលថា ៖ «ខ្ញុំពិតជាមានអារម្មណ៍រំភើបណាស់ ពីព្រោះថារយៈពេល ២ ឆ្នាំហើយដែលខ្ញុំពុំបានឮសំឡេងស្រែកហ៊ោបែបនេះពីអ្នកគាំទ្រ។ ខណៈពេលដែលខ្ញុំរស់នៅប្រទេសកូរ៉េម្នាក់ឯង មានពេលខ្លះក៏ហត់ មានពេលខ្លះក៏ជារឿងធម្មតា។ ជាការពិតទៅទិដ្ឋភាពដែលខ្ញុំកំពុងតែឃើញផ្ទាល់ភ្នែកខណៈនេះ គឺខ្ញុំតែងបានឃើញវាស្ទើរតែរៀងរាល់ខែ កាលពីមុន។
កាលយើងបានជួបគ្នាផ្ទាល់មិនមែនតាមអេក្រង់ទូរសព្ទនេះវាពិតជាមានអត្ថន័យណាស់ ថ្ងៃនេះគឺជាថ្ងៃដែលពួកយើងបាននៅជាមួយគ្នា រាល់វិនាទីវាពិតជាមានន័យណាស់សម្រាប់រូបខ្ញុំ ហើយខ្ញុំក៏មិនដឹងថាពេលណាទើបខ្ញុំនឹងអាចវិលត្រឡប់មកប្រទេសថៃម្តងទៀតនោះទេ ក៏ប៉ុន្តែប្រសិនបើពេលដែលខ្ញុំត្រឡប់ទៅប្រទេសកូរ៉េវិញខ្ញុំនឹងតាំងចិត្តធ្វើការ ព្រមទាំងផលិតនូវស្នាដៃល្អៗ ទុកឱ្យគ្រប់គ្នាបានទស្សនា ។
ខ្ញុំនឹងតាំងចិត្តធ្វើជាតារាម្នាក់ដែលមិនធ្វើឱ្យហ្វេនៗ Agase (អាហ្កាហ្សេ) ខកបំណងនោះឡើយ។ ចង់ឱ្យគ្រប់គ្នានិយាយដោយទំនុកចិត្តនៅពេលបានក្លាយជាអ្នកគាំទ្ររបស់ខ្ញុំ ហើយខ្ញុំចង់ក្លាយជាតារាម្នាក់ដែលមានអ្នកគាំទ្រទូទាំងពិភពលោកទទួលស្គាល់ យ៉ាងណាខ្ញុំនឹងស៊ូ ហើយយើងនឹងបន្តដំណើរទៅជាមូយគ្នា។ ជាចុងបញ្ចប់ខ្ញុំក៏សូមថ្លែងអំណរគុណអ្នកគាំទ្រគ្រប់គ្នា ទោះបីជាមានរឿងអ្វីក៏ដោយក៏គ្រប់គ្នានៅតែផ្តល់កម្លាំងចិត្តមកកាន់ខ្ញុំរហូត»។
បន្ទាប់ពីបានឮពាក្យសម្ដីរបស់ Bam Bam ហើយ គេសង្កេតឃើញថាមានមហាជនអ្នកគាំទ្រថៃជាច្រើនកើតក្ដីរំជួលចិត្តព្រោះមិននឹកស្មានថាពួកគេក៏ជាចំណែកមួយដែលនាំឱ្យតារាសញ្ជាតិថៃរបស់គេអាចឈរលើឆាកដ៏ធំ និង មានអ្នកស្គាល់ច្រើនបែបនេះនោះទេ។ ពួកគេពិតជារំភើបចំពោះ Bam Bam ដែលតាំងចិត្តប្រឹងប្រែងបន្តទៅមុខទោះបីជាមានឧបសគ្គក៏ដោយ៕
