អាយុទើប ៤៥ ឆ្នាំ Ann Thongprasom រស់លើគំនរទ្រព្យសម្បត្តិចាយមួយជីវិតមិនអស់
អាចនិយាយបានថា Ann Thongprasom នាងគឺជាតារាស្រីពហុជំនាញដ៏មានទេពកោសល្យមួយរូបក្នុងវិស័យសិល្បៈថៃ ដែលមានមនុស្សជាច្រើនស្រឡាញ់ពេញចិត្ត លើសមត្ថភាពសម្ដែងដ៏ប៉ិនប្រសប់របស់នាង តាំងពីឆ្នាំ២០០០ មកម្ល៉េះ។
បច្ចុប្បន្ននេះ តួឯកស្រីក្នុងរឿង «វាសនានាងចម» រូបនេះត្រូវបានទស្សនិកជនជាអ្នកគាំទ្រ ហៅថាជា រាជិនីនៃភាពយន្តកម្សាន្ត បន្ថែមពីលើអាជីពជាតារាសម្ដែង រហូតមកដល់ពេលនេះ នាងក៏ជាផលិតករឆ្នើមមួយរូបផងដែរ។
យ៉ាងណាមិញ ជឿថាក៏នៅមានទស្សនិកជនជាច្រើនទៀតមិនទាន់ដឹង អំពីការងារបន្ថែមក្រៅវិស័យសិល្បៈរបស់ Ann ដោយមុខរបរមួយផ្សេងទៀតរបស់នាង គឺផ្តោតលើការវិនិយោគទុនមកច្រើនឆ្នាំមកហើយ លើវិស័យអចលនទ្រព្យ ជាម្ចាស់គម្រោងសាងសង់ផ្ទះល្វែង និង ខុនដូដ៏ប្រណីត រចនាប័ទ្មទំនើបតាមទាន់សម័យ ដែលគេហៅថា Anne’s Place បើកបានសម្ពោធជាផ្លូវការហើយ នៅឯតំបន់ Pattanakarn ក្នុងទីក្រុងបាងកក។
បើងាកមកមើលតាមរយៈការបង្ហោះជារូបភាពនៅលើ Instagram ផ្ទាល់ខ្លួនរបស់តារាស្រីចាស់វស្សារូបនេះ បានបង្ហាញរូបភាពពីជ្រុងផ្សេងៗទាំងទិដ្ឋភាពបន្ទប់ ក៏ដូចជាទីធ្លាទេសភាពខាងក្រៅគួរឱ្យចាប់អារម្មណ៍ រីឯតម្លៃវិញបើតាមការប៉ាន់ស្មានអាចនឹងមានតម្លៃរាប់លានដុល្លារឯណោះ គឺជាប្រភេទខុនដូរស់នៅជាលក្ខណៈគ្រួសារ៕
