ទម្លាយស្ថានភាពតួអង្គ ៤ រូប ក្នុងរឿង «ទឹកចិត្តគ្រូបង្រៀន» ក្រោយបញ្ចាំងចប់ច្រើនឆ្នាំ

ខ្សែភាពយន្តភាគខ្មែរធ្លាប់ទទួលបានការគាំទ្រយ៉ាងច្រើនភ្លូកទឹកភ្លូកដីពីសំណាក់ទស្សនិកជន «ទឹកចិត្តគ្រូបង្រៀន» កាលអំឡុងឆ្នាំ ២០០៧ បានអង្រួនដួងចិត្តអ្នកទស្សនាឱ្យនៅតែចងចាំទិដ្ឋភាពនៃការលែងលះ ការខិតខំប្រឹងប្រែងបង្ហាត់បង្រៀនសិស្សដោយមិនខ្លាចការនឿយហត់។ មនោសញ្ចេតនា និង ភាពកម្សត់កម្រ ការតស៊ូក្នុងជីវិតនៃខ្សែភាពយន្តមួយនេះ បានធ្វើឱ្យដក់ជាប់ក្នុងអារម្មណ៍ប្រិយមិត្តអ្នកទស្សនារហូតហូរទឹកភ្នែកដោយមិនដឹងខ្លួន។

តាមប្រភពពីគេហទំព័រ Archphkai បានរៀបរាប់ពីប្រវត្តិនៃរឿង «ទឹកចិត្តគ្រូបង្រៀន» នេះថា ៖ «រឿងនេះកាលដើមឡើយគឺជារឿងដែលសរសេរជាសៀវភៅប្រលោមលោកមានចំណងជើងថា «ទឹកហូរឡើងភ្នំ»។ រឿងប្រលោមលោកនោះនិពន្ធដោយលោក យឹម សំណាង ដែលបច្ចុប្បន្នគាត់រស់នៅខេត្តបន្ទាយមានជ័យ។ ដោយរឿងនេះមានអត្ថន័យល្អ បង្ហាញពីជីវិតតស៊ូ និងបញ្ជាក់ពីទឹកចិត្តគ្រូបង្រៀន សម្តេច ហ៊ុន សែន ក៏បានឧបត្ថម្ភប្រាក់ដល់អ្នកស្រី ពាន់ ភួងបុប្ផា ដើម្បីរៀបចំដំឡើងរឿងនេះជាខ្សែភាពយន្តវិញម្តង ដោយដូរចំណងជើងថា «ទឹកចិត្តគ្រូបង្រៀន»។

ពេលរំឭកដល់ដល់ខ្សែភាពយន្តមួយនេះឡើងវិញ ជឿជាក់ថាមហាជនច្បាស់ជានឹករឭក និងចង់ដឹងដូចគ្នាថាតើតួអង្គសំខាន់ៗ ៤ ដួងរួមមាន តារាសម្ដែងជើងចាស់ ទេព រិន្ទដារ៉ូ, អ្នកនាង ស្វែង សុជាតា, លោក ញ៉ែម សុគន្ធ និង អ្នកនាង សឿ សុធារ៉ា ក្នុងខ្សែភាពយន្តខ្មែរខាងលើនេះ ទៅជាយ៉ាងណាអស់ហើយ?

១. តារាសម្ដែងជើងចាស់ ទេព រិន្ទដារ៉ូ

តារាសម្ដែងជើងចាស់ លោក ទេព រិន្ទដារ៉ូ មកដល់សព្វថ្ងៃនេះ លោកនៅតែប្រឡូកក្នុងវិស័យសិល្បៈបន្តសាយភាយភាពល្បីល្បាញរបស់ខ្លួននៅក្នុងវិស័យកុន ព្រមទាំងធ្វើជារៀមច្បងក្នុងសិល្បៈដ៏គួរឱ្យគោរពសម្រាប់សិល្បករជំនាន់ក្រោយ។

២. អ្នកនាង ស្វែង សុជាតា

មិនខុសគ្នាកាលពីជិត ២០ ឆ្នាំមុនប៉ុន្មានទេ បច្ចុប្បន្ន ស្វែង សុជាតា នៅតែបន្តទេពកោសល្យសម្ដែងបញ្ចេញស្នាដៃយ៉ាងស្ទាត់ជំនាញរបស់ខ្លួននៅលើវិថីសិល្បៈយ៉ាងរលូន តែ ស្វែង សុជាតា ហាក់មានជីវិតស្នេហាមិនសមបំណង ដោយធ្លាប់ផ្ទុះរឿងអាស្រូវជាមួយប្ដីក្មេងវាយធ្វើបាបផ្អើលអស់អ្នកសិល្បៈ។ បច្ចុប្បន្ន អ្នកនាង ស្វែង សុជាតា នៅតែរក្សាទេពកោសល្យដ៏ប៉ិនប្រសប់របស់ខ្លួន បម្រើអារម្មណ៍ទស្សនិកជន តាមរយៈការសម្ដែងរឿងផ្សេងៗជាច្រើន។

៣. លោក ញ៉ែម សុគន្ធ

បន្ទាប់ពីប្រឡូកសិល្បៈច្រើនឆ្នាំ យ៉ែម សុគន្ធ បានចោលជីវិត Single រៀបការប្រពន្ធ សាងគ្រួសារយ៉ាងមានក្ដីសុខ។ ទោះបីជាបច្ចុប្បន្នតារាប្រុសរូបនេះមានគ្រួសារត្រូវមើលថែក៏ពិតមែន តែ យ៉ែម សុគន្ធ នៅតែបង្ហាញវត្តមានយ៉ាងសកម្មនៅក្នុងវិស័យសិល្បៈដដែល។

៤. អ្នកនាង សឿ សុធារ៉ា

តួឯកស្រីដ៏ល្បីល្បាញ សឿ សុធារ៉ា បានចោលជីវិតសិល្បៈសំងំរស់នៅមើលថែក្រុមគ្រួសារយ៉ាងមានសុភមង្គលអស់រយៈពេលជាច្រើនឆ្នាំ ទើបតែនៅមួយរយៈចុងក្រោយនេះ សឿ សុធារ៉ា បានត្រឡប់មកវិស័យសិល្បៈជាថ្មីម្ដងទៀត ធ្វើឱ្យមហាជននឹករឭកដល់ការសម្ដែងរបស់នាងជាខ្លាំង។ ជាមួយគ្នានេះ តារាសម្តែង សឿ សុធារ៉ា ក៏បានផ្ទុះព័ត៌មានអាស្រូវលុយកាក់ជាច្រើនរឿង ផ្អើលអស់អ្នកគាំទ្រផងដែរនាមួយរយៈចុងក្រោយនេះ៕