![នាយចឺម ចាយជីវិតអភិជនញាក់ សម្ញែងឡានទំនើបជិះផ្ទាល់ខ្លួន តម្លៃរាប់ម៉ឺនដុល្លារ](https://www.popular.com.kh/wp-content/uploads/2022/02/BeBe-25-02-22-01.jpg)
នាយចឺម ចាយជីវិតអភិជនញាក់ សម្ញែងឡានទំនើបជិះផ្ទាល់ខ្លួន តម្លៃរាប់ម៉ឺនដុល្លារ
ចាប់តាំងពីស្រវ៉ាអាជីពជាតារាចម្រៀងមក នាយចឺម បានកែប្រែជីវភាពស្ទើរទាំងត្រឹមមួយប៉ព្រិចភ្នែក ដោយនាយមានលទ្ធភាពសាងសង់ផ្ទះតម្លៃរាប់ម៉ឺនដុល្លារជូនអ្នកមានគុណនៅស្រុកកំណើត ចំណែកឯជីវិតប្រចាំថ្ងៃ តារាចម្រៀងវ័យក្មេងរូបនេះក៏រស់នៅបែបហ៊ឺហារមានលុយចាយពេញៗដៃ ពាក់គ្រឿងអលង្ការជ្រែកខ្លួន ជាពិសេសជិះសុទ្ធរថយន្តទំនើបតម្លៃរាប់ម៉ឺនដុល្លារ។
និយាយដល់ភាពមានបានក្រោយផ្លាស់ប្ដូរវាសនាពីតារាកំប្លែងមកក្លាយជាតារាចម្រៀងវ័យក្មេងប្រចាំផលិតកម្មសាន់ដេ នាយចឺម ចាប់ផ្ដើមមានមហាជនគាំទ្រកាន់តែច្រើន ហើយបទចម្រៀងជាច្រើនរបស់នាយ ក៏កំពុងពេញនិយមក្នុងស្រទាប់មហាជនផងដែរ ធ្វើឱ្យតារាប្រុសរូបនេះ វាយលុកទីផ្សារការងារមិនចាញ់រៀមច្បងក្នុងសិល្បៈឯទៀតប៉ុន្មានទេ។
រឿងដែលភ្ញាក់ផ្អើល និង ធ្វើឱ្យមហាជនបើកភ្នែកធំៗសម្លឹងមិនដាក់ភ្នែកនោះ ថ្មីៗនេះ នាយចឺម បានបង្ហោះរូបថតមួយសន្លឹកបង្ហាញពីទិដ្ឋភាពដៃកាន់ចង្កូតឡានថ្មីសន្លាងមួយគ្រឿងម៉ាក Mustang តម្លៃរាប់ម៉ឺនដុល្លារដែលនាយទើបនឹងទិញក្ដៅៗនៅថ្ងៃទី ២៤ កុម្ភៈ ២០២២ ម្សិលមិញ។ ក្រោយបង្ហាញជីវិតអភិជននេះភ្លាម គេក៏ឃើញមានមហាជនអ្នកគាំទ្រជាច្រើនបានចូលរួមអបអរសាទរដល់នាយ ព្រមទាំងមានការលើកសរសើរពីការខំប្រឹងរហូតរស់នៅក្នុងជីវភាពធូរធាទាំងវ័យក្មេងរបស់នាយផងដែរ៕