បេក្ខជន ៣ រូប ឈ្នះពានពីកម្មវិធីប្រឡងចម្រៀងពិភពលោក សុទ្ធតែធ្លាប់ ឆន សុវណ្ណារាជ បង្ហាត់

នៅរាត្រីថ្ងៃទី ៦ ខែមីនា ឆ្នាំ ២០២២ កន្លងទៅនេះ កម្មវិធីប្រឡងចម្រៀងកម្រិតពិភពលោក Beat The Best ​​​​​​​​​​​​​​​​​​​រដូវកាលទី ១ បានប្រកាសរកឃើញម្ចាស់ជ័យលាភីលេខ ១ ហើយ គឺលោកទៅលើ សួ វិចិត្រ ជាបេក្ខជនមកពីខេត្តពោធិ៍សាត់។

ម្ចាស់ពានរង្វាន់ Beat The Best ដំបូងរបស់កម្ពុជា លោក សួ វិចិត្រ រំភើបត្រេកអរក្រៃលែង ខណៈពិធីករបានប្រកាសឈ្មោះរបស់ខ្លួនក្លាយជាម្ចាស់ជ័យលាភីលេខ ១ ព្រោះថានេះគឺជាក្ដីស្រមៃដ៏ធំបំផុតសម្រាប់រូបគេ។

យ៉ាងណាមិញ បើក្រឡេកទៅមើលលោក ឆន សុវណ្ណារាជ ដែលជាប្រធានក្រុមឯនោះវិញ ក៏ត្រេកអរមិនតិចនោះដែរ ដែលការបើកទំព័រជ័យលាភីដំបូងនៃកម្មវិធី Beat The Best គឺត្រូវបានធ្លាក់ទៅលើកូនក្រុមរបស់លោកនោះ។

ដោយឡែក ក្រោយពីលោក សួ វិចិត្រ ទទួលបានពានរង្វាន់ហើយនោះ មហាជនអ្នកគាំទ្រកម្មវិធីប្រកួតចម្រៀងរបស់ស្ថានីយទូរទស្សន៍ហង្សមាស ហាក់មានការលាន់មាត់គ្រប់ៗគ្នាថា លោក ឆន សុវណ្ណារាជ គឺជាប្រធានក្រុមនាំសំណាងដល់បេក្ខភាព ក៏ព្រោះមានជ័យលាភីចំនួន ៣ រូបហើយ ដែលមកពីកម្មវិធីផ្សេងៗគ្នាដណ្តើមបានពាន ហើយជាកូនក្រុមរបស់លោក។

១. លោក នី រតនា ជ័យលាភី Cambodian Idol រដូវកាលទី ១

២. លោក ប៊ុត សីហា ជ័យលាភី The Voice Cambodia រដូវកាលទី ១

៣. លោក សួ វិចិត្រ ជ័យលាភី Beat The Best