ពេលឃើញ ឈីន រតនៈ និង ចំរើន សុភ័ក្រ្ដ ទិញរថយន្តថ្មីក្នុងថ្ងៃតែមួយ ណុប បាយ៉ារិទ្ធ បោះសម្តីនេះឡើងភ្លែត
នៅថ្ងៃទី ១៨ ខែមីនា ឆ្នាំ ២០២២ កន្លងទៅនេះ អ្នកលេងបណ្ដាញសង្គម ជាពិសេសអ្នកគាំទ្រវិស័យចម្រៀងមានការចាប់អារម្មណ៍ខ្លាំង ក្រោយពីបានឃើញតារាចម្រៀងស្រី ២ រូបនេះ ដែលជាអតីតបេក្ខភាឆ្នើមនៃកម្មវិធី The Voice Cambodia រដូវកាលទី ១ គឺ កញ្ញា ចំរើន សុភ័ក្ដ្រ និង កញ្ញា ឈីន រតនៈ បានចាយលុយរាប់ម៉ឺនដុល្លារទិញរថយន្តទំនើបយ៉ាងថ្មីសន្លាងក្នុងថ្ងៃតែមួយ។
ក្រោយឃើញបែបនេះ អ្នកគាំទ្រ ក៏ដូចជាអ្នកសិល្បៈជាច្រើន បានធ្វើការសម្ដែងនូវការអបអរសាទរខ្លាំងចំពោះ តារាចម្រៀងស្រីទាំងពីរដួងនេះ ដែលទទួលបានសមាជិកថ្មី និង អ្នកទាំងពីរបានឱ្យដឹងថាជាការបំពេញស្រមៃរបស់ខ្លួន ក្រោយពីតស៊ូក្នុងវិស័យសិល្បៈជាច្រើនឆ្នាំកន្លងមកទម្រាំតែជោគជ័យដល់ចំណុចនេះផងដែរ។
ជាមួយគ្នានោះដែរ គេក៏បានឃើញតារាចម្រៀងប្រុសល្បីឈ្មោះ ណុប បាយ៉ារិទ្ធ ដែលត្រូវជាគណៈកម្មការមួយរូប និង អតីតមេក្រុមបង្ហាត់របស់ តារាចម្រៀងស្រីទាំងរូបនេះ ក្នុងកម្មវិធី The Voice Cambodia រដូវកាលទី ១ នោះ ក៏បានបង្ហោះសារទម្លាយនូវអារម្មណ៍រំភើបចិត្ត និង សាទរចំពោះអតីតកូនក្រុមទាំងពីរ ជាមួយនឹងភាពជោគជ័យដើរដល់ចំណុចនេះ និង រៀបរាប់ពាក្យពេចន៍ដ៏មានន័យជាច្រើនទៀតទៅកាន់អ្នកទាំងពីរផងដែរ។
សារនោះ លោក ណុប បាយ៉ារិទ្ធ បានសរសេរថា ៖ «អរគុណពេលវេលាឱ្យពួកយើងស្គាល់គ្នា ពីកូនក្រុមក្នុងកម្មវិធី មកជាប្អូន រួមសុខ រួមទុក្ខ ផ្តល់កម្លាំងចិត្តឱ្យគ្នា ឈានមកដល់ចំណុចនេះ គឺជាមោទកភាពមួយសម្រាប់ប្អូនទាំង ២ មិនខ្វល់នឹងគេថាយើងអន់ មិនខ្វល់គេស្រឡាញ់យើងឬអត់ តែយើងត្រូវច្បាស់ថាបានស្រឡាញ់គេរួចហើយ លទ្ធផលបែបណាចាំគិតទៀត។ អរគុណការមើលងាយ អរគុណការឈឺចាប់ដែលជំរុញទឹកចិត្តឱ្យឈានមកដល់ចំណុចនេះ អ្នកចង់ធ្វើជាកូនឆ្មា ឬ ចង់ធ្វើជាកូនតោ គឺនៅលើខ្លួនយើងជាអ្នកកំណត់ពីអត្តសញ្ញាណខ្លួនឯង។ ស៊ូ ស៊ូ បន្តរដំណើរទៅមុខទៀត ទៅរកជោគជ័យធំជាងនេះទៀត។ ចុងក្រោយបងចង់ប្រាប់ថា ៖ ដរាបណាអ្នកនៅមានកម្លាំងចិត្ត ចូរឆ្លាក់ជីវិតរបស់ខ្លួនឯងឱ្យបានល្អបំផុត នោះអ្នកនឹងដឹងច្បាស់ពីខ្លួនឯងថាអ្នកមិនអន់ទេ»៕
