ម្តាយក្មេក Chompoo អរកខិបកខុប ធ្លោយមាត់ប្រាប់ភិនភាគខ្លះរបស់ចៅស្រី ឡើងផ្អើលមហាជន

កាលពីពេលថ្មីនេះ មហាជនហាក់នៅរំភើបនៅឡើយទេ ក្រោយទទួលបានដំណឹងថា តារាស្រី Chompoo Araya សម្រាលបានទាយាទស្រីដំបូងម្នាក់ចូលមកក្នុងគ្រួសារត្រកូល Visarut។

ជុំវិញដំណឹងដ៏សែនរំភើបមួយនេះ មិនត្រឹមតែក្រុមគ្រួសាររបស់តារាស្រី Chompoo ឡើយដែលរំភើបចិត្ត និង ត្រេកអរនោះ តែសូម្បីតែអ្នកគាំទ្រ និង មិត្តៗសិល្បៈរបស់នាង ក៏សម្តែងការស្វាគមន៍មិនតិចនាក់ដែរចំពោះការចាប់កំណើតរបស់ក្មេងស្រីតូច Abigail មកកាន់គ្រួសារអ្នកម៉ាក់សម័យថ្មី Chompoo និង លោកប៉ារូបសង្ហា Note visarut នោះ។

ដោយឡែក អ្វីដែលកាន់តែពិសេសជាងនេះទៅទៀតនោះ នៅថ្ងៃទី ១ ខែមេសា ឆ្នាំ ២០២២ នេះ ពិធីករប្រុសល្បីលោក Moddam ក៏បានទម្លាយរឿងរ៉ាវវដ៏សែនរំភើបចិត្តជូនទៅដល់មហាជនបានស្តាប់ថា ថ្ងៃដែលតារាស្រី Chompoo សម្រាលរួច លោកបានជួបទៅនឹងម្តាយក្មេករបស់នាង ដោយលោកស្រីបានពោលពាក្យទាំងក្តីរំភើបមកកាន់លោកថា ៖ «ពេលនេះខ្ញុំបានចៅស្រីមួយនឹងគេហើយ ថែមទាំងមានពណ៌សក់កាត់ដូចជនជាតិបារាំងថែមទៀតផង»។

យ៉ាងណាមិញ ក្រោយលោក Moddam ទម្លាយបែបនេះ រឹតតែធ្វើឱ្យអ្នកគាំទ្រគ្រួសាររបស់តារាស្រី Chompoo កាន់តែជ្រួលជ្រើមចង់ឃើញមុខកូនស្រីរបស់នាងកាន់តែខ្លាំងលើសដើម ព្រោះមកទល់ពេលនេះ ២ ថ្ងៃទៅហើយដែលនាងសម្រាលកូនស្រីពៅរួច តែនៅពុំទាន់បង្ហាញមុខកូនស្រីពៅឱ្យមហាជនបានឃើញនៅឡើយទេ៕

ប្រភព៖ khao2u