Mo Amena ស័្មគ្រតស៊ូឆ្លងកាត់ព្យុះភ្លៀងស្នេហាជាមួយ Tomboy បើទោះបរាជ័យរាប់ដងមិនអស់

ប្រិយមិត្តមួយចំនួនប្រាកដជាបានស្គាល់មកហើយ នូវតារាស្រីវ័យ ៣៦ ឆ្នាំ Mo Amena  ដែលជាតារាសម្តែងមួយរូប មានទឹកចិត្តខ្នះខ្នែងជួយឈឺឆ្អាលរឿង Tangmo នាពេលកន្លងមកនោះ។

យ៉ាងណាមិញ បើក្រឡេកមកមើលជីវិតរបស់តារាស្រីរូបនេះ គេឃើញនាងមានរឿងរ៉ាវជាច្រើនណាស់ ដែលធ្វើឱ្យមហាជនភ្ញាក់ផ្អើល ជាពិសេសគឺរឿងរសនិយមខាងស្នេហាតែម្តង។

តាមព័ត៌មានបានឱ្យដឹងថា​ Mo Amena គឺជាមនុស្សស្រីម្នាក់ ដែលភាគច្រើនចូលចិត្តសាងស្នេហាផ្អែមល្ហែមជាមួយនឹង Tomboy ច្រើនជាងបុរសធម្មតា ដោយនាងចាប់ផ្តើមទាក់ទង Tomboy បែបនេះ តាំងពីនៅរៀនមកម៉្លេះ ហើយនាងបានឆ្លងកាត់ព្យុះភ្លៀងស្នេហាជាមួយនឹងពួកគេអស់ជាច្រើននាក់មកហើយ ប៉ុន្តែមានតែគូស្នេហ៍ពីរនាក់ប៉ុណ្ណោះ ដែលនាងបានទាក់ទង និង បង្ហាញមុខជាផ្លូវការដល់សារធារណៈ។

ក្នុងនោះ មនុស្សដំបូងដែលមហាជនស្គាល់ថាជាគូស្នេហ៍របស់ Mo Amena គឺជា Tomboy មួយរូបឈ្មោះ Ploy ជាអ្នកជំនួញ ហើយពួកគេបានទាក់ទងគ្នាមិនយូរប៉ុន្មានឡើយ ក៏សម្រេចចិត្តចូលរោងការជាមួយគ្នា តែបានត្រឹមតែ ២ ឆ្នាំប៉ុណ្ណោះ មកដល់ឆ្នាំ ២០១៩ អ្នកទាំងពីរក៏ចែកផ្លូវគ្នាទៅវិញស្ងាត់ៗ ដោយសារតែមានរឿងចម្រូងចម្រាសរស់នៅជាមួយគ្នាមិនបាន។

យ៉ាងណាក៏ដោយ មិនយូរប៉ុន្មានស្រីស្រស់ Mo Amena ក៏បានរកឃើញអ្នកស្អំបេះដូងថ្មីមួយទៀតភ្លែត ដោយកាលពីខែកញ្ញា ឆ្នាំ ២០២១ កន្លងទៅនេះ នាងបាននាំសង្សារថ្មីរបស់ខ្លួនមកបង្ហាញមុខឱ្យមហាជនបានស្គាល់ជាថ្មី។

តាមព័ត៌មានបានឱ្យដឹងថា សង្សារថ្មីរូបនេះ មានអាយុប្អូននាងរហូតដល់ ៧ ឆ្នាំឯណោះ ហើយពួកគេបានជួបគ្នានៅកន្លែងសម្តែងរឿង ដោយសង្សារថ្មីនេះ គឺជាជំនួយការអ្នកដឹកនាំរឿងម្នាក់។ យ៉ាងណាមិញ មើលទៅហាក់ប្រាកដប្រជាជាមួយស្នេហាមួយនេះណាស់ នាងបានឱ្យដឹងថា ស្នេហ៍មួយនេះ គឺជាស្នេហាចុងក្រោយហើយ​ បើសិនជាវាមិនទៅមុខដូចលើកមុនទៀត នាងនឹងមិនទទួលយកនរណាទៀតឡើយ៕