ទើបសម្រាលកូនទី ៣ បានជិតកន្លះខែ Chompoo ចេញក្រៅដើរចាយរាងឡើងអ៊េម
ដូចដែលប្រិយមិត្តអ្នកគាំទ្រតារាសម្ដែងស្រី Chompoo Araya ដឹងមកហើយ កាលពីជាង១សប្ដាហ៍មុននេះ តារាស្រីរូបនេះ ទើបតែបានសម្រាលកូនស្រីទី ៣ ឈ្មោះថា Abigail នាំយកក្តីរំភើបរីករាយដល់ក្រុមគ្រួសាររបស់នាង ព្រមទាំងអ្នកគាំទ្រផងដែរ។ ព្រោះថាកូនស្រីម្នាក់នេះ បានចូលមកបំពេញបំណងគ្រួសាររបស់គេ យ៉ាងមានន័យ និងបន្ថែមសុភមង្គលឱ្យស្រស់ស្រាយខ្លាំងបំផុត។
រហូតមកដល់ពេលនេះ Chompoo នាងបានសម្រាលកូនស្រីពៅ ១១ថ្ងៃមកហើយ ប៉ុន្តែមើលទៅតារាស្រីរូបនេះ ហាក់ដូចជាមានកម្លាំងរឹងដៃរឹងជើងវិញហើយ បន្ទាប់ពីសម្រាកយកកម្លាំងក្រោយសម្រាលរួច។ ជាក់ស្ដែង នៅថ្ងៃទី ១០ខែមេសា ឆ្នាំ២០២២ មើលតាមរយៈបណ្តាញសង្គម Instagram របស់តារាស្រីរូបនេះ បានឱ្យដឹង នាងបានណាត់មិត្តភក្តិម្នាក់ នៅញ៉ាំ Omakase ជាប្រភេទអាហារបែបជប៉ុន នៅភោជនីយដ្ឋានមួយកន្លែងក្នុងទីក្រុងបាងកក។
គ្រាន់តែឃើញបែបនេះ អ្នកគាំទ្រជាច្រើនលាន់មាត់ស្រឡាំងកាំងនឹងរូបរាងរបស់អ្នកម្ដាយកូន ៣ នេះយ៉ាងខ្លាំង ព្រោះថាទើបសម្រាលកូនបានជិតកន្លះខែសោះ នាងអាចដើរចេញក្រៅបានយ៉ាងស្រួលខ្លួន និងកម្លាំងកំហែងដូចមនុស្សធម្មតាមិនមានរឿងអ្វីសោះ៕
