ហ្វេនគាំទ្រព្រាត! លីន សោម៉ា ត្រៀមដាក់ពាក្យប្រឡងបវរកញ្ញា Miss Universe Cambodia
តារាចម្រៀងស្រីរៀងតូចច្រឡឹងដែលលេចពន្លកចេញពីកម្មវិធីប្រឡងចម្រៀង Cambodian Idol លីន សោម៉ា តែងធ្វើឱ្យមហាជននឹកស្មានមិនដល់ពីទេពកោសល្យផ្នែកសិល្បចម្រៀងពីធម្មជាតិរបស់នាង បើទោះបីនាងតូចមានមាឌតូចល្អិតតែមានទឹកដមសំឡេងស្រួលស្រែស និង ទទួលបានការចាប់អារម្មណ៍ជាខ្លាំងពីបណ្ដាមជ្ឃដ្ឋានជុំវិញ។
លីន សោម៉ា មិនដែលចុះចាញ់ឡើយនៅក្នុងអាជីពសិល្បៈរបស់នាង ដ្បិតថាកន្លងមក សោម៉ា បានបរាជ័យនៅក្នុងកម្មវិធីប្រឡងចម្រៀងច្រើនលើក ប៉ុន្ដែ សោម៉ា បានទាញការចាប់អារម្មណ៍ ក៏ដូចជាប្រជាប្រិយភាពពីមហាជនទាំងវ័យក្មេង។
ដោយឡែកថ្មីៗនេះ លីន សោម៉ា បានធ្វើឱ្យមហាជនភ្ញាក់ផ្អើលជាថ្មី បន្ទាប់ពីតារាស្រីរូបនេះបានបង្ហាញពាក្យសម្រាប់ស្នើសុំក្លាយជាបេក្ខភាពចូលរួមប្រឡងក្នុងកម្មវិធី Miss Universe Cambodia ហើយនាងថែមទាំងបានរៀបរាប់យ៉ាងជឿជាក់ទៀតថា ៖ «ចាំជួយគាំទ្រផង»។
គ្រាន់តែ លីន សោម៉ា បង្ហាញចេតនាត្រៀមចូលរួមប្រកួតកម្មវិធីបវរកញ្ញាខាងលើភ្លាម គេឃើញមានអ្នកគាំទ្រជាច្រើនបាននាំគ្នាជំរុញឱ្យនាងចូលរួមប្រកួត តែ សោម៉ា បានត្រឹមឆ្លើយតបទៅវិញថា នាងគ្រាន់តែលេងសើចប៉ុណ្ណោះ។ សោម៉ា ថា ៖ «អូន Prank ទេ មើលកម្ពស់អូនផងឡើងញិបមួយទៅប្រឡងឯណា»៕
